Yeremia 2 - ICIGHAN BIBILO

¹ Man shi kwaghôron u TER va her a mo er:

² Za, za yila sha ato a Yerusalem, kaa Wer: TER ngu kaan nahan er: Sha kwagh wou yô, M umbur erdoo u iyev ou man dooshima u ivaa you, er u dondo sha a Mo ken taaikôngo, hen tar u i lee kwagh her ga yô.

³ Iserael lu TER icighankwagh je, atam a tsutswa a iyiav Nav; mba ve ye un cii, á na ve ibo, kwaghbo una tser ve, kape TER A kaa ne.

⁴ Ungwa nen kwaghôron u TER, we ya u Yakob, kua icombor i ya u Iserael cii;

⁵ TER ngu kaan nahan er: Ka nyi mban u mimi uter enev ve zough a mi ken a Mo, je u ve gba ca a Mo, ve dondo kwagh u gbilinigh ityô, man ve hingir gbilin nahana?

⁶ Ve kera pine er: TER u A dugh a vese ken tar u Igipiti la yô, ngu han ga, Wen u A kar a vese ken taaikôngo, ken tar u udeserti man u ahungwa, ken tar u ikpoghonya man u mure u kuugh, ken tar u or nan karen ken u ga, man ma or kpaa nan tem ya ker ga yô?

⁷ Man shi M va a ven ken tar u doon iyiagh, sha u ne̱ ya atam a u, man mdoom ma u; kpa er ne nyôr yô, ne hôngor Mo tar, ne gema dyako Wam hingir kwagh u ndôhôrshima.

⁸ Upristi ve kera pine er: TER ngu hana? ga. Mbaeren tom u atindigh kpaa ve fam ga; mbatarev kpaa per atindi a Am; uprofeti kpaa ôr kwagh sha Baal, man ve dondo sha akaa a a fatyô u nan or ma kwagh u injaa ga yô.

⁹ Ka sha ci u nahan shi Me nôngo num a ven, kape TER A kaa ne; man ônov mba ônov enev kpaa, Me nôngo num a ve.

¹⁰ Yô, per, za ase hen ityar i hen kpe u zegemnger i Kitim man nenge nen; tindi nen hen Kedar, ver nen ishima dedoo, nenge nen; shin injakwagh ne vande eren nahan je kpa?

¹¹ Ikurior igen ngi i musan mbaaôndo vev mayange kpa? shin er ve lu mbaaôndo mba mimi ga nahan kpaa. Kpa ior Av ve tôô icivir ve, ve musan akaa a a fatyô u nan or ma kwagh u injaa ga la a mi.

¹² Ne Usha, i̱ cier ne iyol sha kwagh ne, cia nen tsung, i̱ kondo ne iyol, kape TER A kaa ne.

¹³ Gadia ior Av ve er aferakaa ahar: ve tam kera, Mo u M lu imbor i mngerem ma umam ne, ve gema ve time ahungwa a ombon mngerem shimi shin avande, ahungwa a ombon mngerem shimi a paven ikwe, a a fetyô u lun a mngerem shin mi ga yô.

¹⁴ Iserael ka kpan jee? I mar un a mar hen ya? Ka sha ci u nyi man a hingir ishar i yana?

¹⁵ Agumabegha ve ta un kume, ve taver imo; ve gema tar na hingir ice; i nande agar a na sha usu, or kera tema ker ga.

¹⁶ Ior i Memfishi man Tahapanheshi la ve kômbo u ityough.

¹⁷ Kera ka we man u ne iyol you kwagh ne, sha ci u u undu TER, Aôndo wou, zum u A hemen we sha gbenda la, gaa?

¹⁸ Tsô, ka nyi i gbe u a gbenda u Igipiti sha u man mngerem ma ifi u Nili? Man shi ka nyi i gbe u a gbenda u Ashiria, sha u man mngerem ma ifi u Uferati?

¹⁹ Iferkwagh you ia tsaha u, man mhirjime wou una yange u; fa man nenge, er ka kwagh u bo man u yuwan er u undu TER, Aôndo wou, man er mcie u cian Mo la, a kera lu ker a we ga yô, kape Ter A kaa ne, TER u akum a Sha.

²⁰ Gadia hii tsuaa je u sombo igbur you man u tôndo ikangenev you kera, u kaa wer: Me kera er tom ga; gadia sha hanma igungu u taven kua shin hanma kon u hômon je, u ngurum her er idyakwase nahan.

²¹ Nahan kpaa, Mo M môôr we er kon u wain u injaa, ivor i mimi; man ka nyi u gem u hingir Mo agbaa a bo a kon u wain ugen nahana?

²² Shin u ôô iyol you sha mtse man u tôô icahul kpishi, nahan kpaa iferkwagh you ngi sha ishigh Yagh er zure u koughon ga nahan, kape Ter AÔNDO A kaa ne.

²³ Er nan man u kaa wer: M hôngor ga, Ubaal kpaa m dondo ve ga? Nenge gbenda wou shin pev, fa kwagh u u er yô, mgbianrakumi u zenden fefa man hurugh hurugh;

²⁴ mgbianjaki u ken toho u i hool un ken taaikôngo, u kuran ahumbe sha isharen na je; ka anti nana yange un sha shighe u a hie laa? Mbakeren un cii vea ya ican sha u keren un ga; ken uwer na vea tser a na.

²⁵ De rumun wer nguhar wou u̱ tsuwa ikôvough kera ga, man gôngor wou kpaa a̱ de om imura ga; kpa u kaa wer: Gbenda ngu ga, ei, gadia mbaaôndo mbagenev doom ishima, ka ve me dondo ve ye.

²⁶ Er ormbaiv ka nan va ahenge zum u i ker nan nahan, kape ya u Iserael kpaa a ve ahenge la; ve man utor vev man mbatarev vev man upristi vev man uprofeti vev;

²⁷ ve mba ve kaan a tiônkon er: We u ngu terem je; man shi a iwen er: ka we u marem ye; gadia ve gema ijime a Mo, ve ver ishigh sha a Mo ga; kpa sha shighe u ican ia tser ve la, vea kaa a Mo er: Mough sha, yima se!

²⁸ Tsô mbaaôndo ou mba u er sha ci wou la mba hana? Ve̱ mough ase sha, aluer vea fatyô u yiman we sha shighe u ican you yô, gadia er iyenge i agar a ou i lu nahan, kape mbaaôndo ou kpaa ve lu la, we Yuda.

²⁹ Ka sha ci u nyi man ne hendan kwagh a Mo? Ne cii ne per atindi a Am, kape TER A kaa ne.

³⁰ Ka gbilin tsô man M gbidi ônov enev ye; ve rumun mkôôm ga; sanker wen wua uprofeti enev, er begha ka a ande kwagh nahan.

³¹ We, ikov ne, ungwa nen kwaghôron u TER. M hingir Iserael taaikôngo je vee? Shin tar u angôghimee? Ka nyi man ior Av ve kaan er: Se mba zenden sha ishima yase se kera va her a We ga nahana?

³² Iniunkwase á fatyô u hungul ikav nav mbi hweev je, shin kwasehe una hungul kwange na u sha hwe je kpa? Nahan kpaa ior Av je kera umbur Mo ga, ayange gande u ôron.

³³ U fa u sôron gbenda wou sha u keren dooshima zee! Ka nahan man igbenda you i hool we sha aferakaa ye.

³⁴ Sha akondo a ou kpaa i zua a awambe a mbaatsanev mba ve lu a ishô yô; u kohol ve hemben iyou shin iin kwagh kpaa ga; er akaa ne a lu nahan kpaa u gema,

³⁵ u kaa wer: Mo m ngu a ishô; iyugh Na kar her a mo kera je. Nenge, Me za a we sha ijir, sha ci u u kaa wer: M er isholibo ga, yô;

³⁶ Ka nyi u zenden wue wue kpishi sha u geman gbenda wou nahana? Ú va ahenge ken Igipiti kpaa, vough er u ve ahenge ken Ashiria nahan.

³⁷ Her a na kpaa ú mough ú due a ave ou sha ityou; gadia TER venda mba u suur sha a ve la; mayange á lagh u a ve ga.