Yeremia 19 - ICIGHAN BIBILO

¹ TER kaa nahan er: Za, za yam agu u ormaantyegh, due a mbatamen mbagenev, kua upristi mba tamen mbagenev;

² za shin Pev u Ben-hinom, u a lu sha ishigh ki Hunda u Atsengegh la, za yôô akaaôron a Me kaa U la, heregh;

³ kaa wer: Ungwa nen kwaghôron u TER, ne utor mba Yuda, kua ne mba ne tem ken Yerusalem; TER u akum a Sha, Aôndo u Iserael, ngu kaan nahan er: Nenge, Me va a kwaghbo sha ijiir ne, u hanma or u nana ungwa un, ato á hura nan ker yô;

⁴ sha ci u ve undum man ve nzughul a ijiir ne, ve nande mbaaôndo mbagenev nagh ker, mba, ve man uter vev kua utor mba Yuda kpaa fa ve ga la; man ve iv ijiir ne sha awambe a mbaishôôv a i hee a inya la;

⁵ man ve maa ajiir a taven sha a Baal, sha u nanden ônov vev mba nomso sha usu, nan Baal iniav mbi nanden a mi, kwagh u M ne zwa ga, man shi M kaa kpaa ga, man shi a nyer ken ishima Yam kpaa ga yô.

⁶ Nahan yô, nenge ayange nga van, kape TER A kaa ne, a á kera yila ijiir ne er Tofeti, shin Pev u Ben-hinom kpaa ga, kpa á yila er Pev u Wuan ior heregh.

⁷ Me vihi mhen u Yuda man Yerusalem hen ijiir ne, Me na, vea kpe ku u sha sanker sha ishigh ki mbaihomov vev, man sha uwegh ku mba ve keren uma ve yô; Me na akom a ve kpaa, aa hingir kwaghyan u inyon i Sha man u ishôso i shin tar kpaa.

⁸ Me gema gar ne una hingir kwagh u cieryol man kwagh u gbiren iwer min; hanma or u nana kar her yô, á cier nan iyol, nana gbire iwer sha ci u atsan a a um sha a na la cii.

⁹ Shi Me na, vea ya inyam i ônov vev mba nomso kua inyam i ônov vev mba kasev, hanma or nana ya inyam i ikar u nan, sha mkase u i kase gar man m-imbishi u mbaihomov vev, man mba ve keren uma ve, vea imbishi ve yô.

¹⁰ Nahan hembe agu la sha ishigh ki ior mba ve ze a we la,

¹¹ man kaa a ve wer: TER u akum a Sha ngu kaan nahan er: Kape M hembe ior mban kua gar ne je ne, er or ka nan hembe ityegh je ki gande u shi sôron la; man vea ii ken Tofeti sha ci u ijiir i iin, ia shi ape genegh ga yô.

¹² Kape Me er a ijiir ne je ne, kua mba ve tem ken i, kape TER A kaa ne; Me gema gar ne una hingir er Tofeti nahan je;

¹³ uya mba Yerusalem man uya mba utor mba Yuda vea hingir er Tofeti nahan, ijiir i i lu wang ga yô, uya cii mba i nanden akum a Sha cii nagh sha ityor ve la, shi i toon mbaaôndo mbagenev iniav mbi man sha mi la.

¹⁴ Nahan Yeremia hire hen Tofeti, henpe TER tindi un sha u za ôron kwagh la; a va tile hen tembe u iyou i TER, man a kaa a ior cii er:

¹⁵ TER u akum a Sha, Aôndo u Iserael, ngu kaan nahan er: Nenge, Me va a kwaghbo sha gar ne kua angarev nav cii, u M ter sha a ve la cii; sha ci u ve nembe ikôr, ve kera ongo akaaôron Am ga yô.