Yeremia 18 - ICIGHAN BIBILO

¹ Kwaghôron ne due hen TER va hen Yeremia, er:

² Mough za shin iyou i ormaantyegh, ka shin la man Me na, ú ungwa akaaôron Am ye.

³ Nahan m sen shin iyou i ormaantyegh; man nenge, a lu eren tom ave je, sha ikyekye.

⁴ Ityegh ki a lu maan la, ki vihin kera yô, er inyatyuu ka i er sha ave a ormaantyegh nahan, a maa a gema ki ityegh kigenegh kposo, er i doo ormaantyegh la u eren yô.

⁵ Tsô kwaghôron u TER va her a mo, er:

⁶ We ya u Iserael, Me kera fatyô u eren a ven er ormaantyegh ne nahan gaa? Kape TER A kaa ne. Nenge, er inyatyuu ka i lu ken uwegh ku ormaantyegh nahan, kape ne kpaa ne lu ken uwegh Agh ne, we ya u Iserael.

⁷ Shighe gen ka M ôr kwagh sha ikurior, man sha tartor, sha u wuhen man u yôhôl man u timin ve kera;

⁸ kpa aluer ikurior i M ter i la, ia gema ia undu ifer i i yô, Me vaa afanyô, Me de kwaghbo u M we ishima u eren i la.

⁹ Shighe gen yô, ka M ôr kwagh sha ikurior, man sha tartor, sha u maan man u môôr ve,

¹⁰ kpa aluer vea er ifer sha ishigh Yagh, vea wa iko sha imo Yam ga yô, nahan Me vaa afanyô, Me de kwagh u doon u M kaa Mer, Me er ve la.

¹¹ Nahan hegen yô, shi ôr kwagh a ior i Yuda man mba ve tem ken Yerusalem, kaa wer: TER ngu kaan nahan er: Nenge, M ngu sôron kwaghbo veren a ver, Mer, a̱ va tser ne, man M ngu henen kwagh u Me er ne yô; shi hide nen, hanma or nana̱ gbihi gbenda u nan u ifer la, sôr igbenda yen kua aeren a en.

¹² Kpa mba kaan er: Ka gbilin tsô, sé zende sha mbamhen asev, man hanmô wase nana er sha mcighir u ishima i nan i bo la.

¹³ Nahan yô, TER ngu kaan nahan er: Pine nen ase ken akuraior, ner: Ka anti nan vande ungwan imbakwagh ne; iniunkwase i Iserael er kwagh u vihin je zua ga.

¹⁴ Senou u sha Lebanon la, una de luun sha vande u sha ikôngo la mayange kpa? Shin mngerem ma ndôhôr ma ma kough ken ijiir i caa maa uma keraa?

¹⁵ Nahan kpaa, ior Av yô, M hungul ve, ve nande akaagbilinigh nagh; ve nôngo gbev sha igbenda ve, igbenda i tsuaa la, er ve gem ve zenden sha anigbendav mba sha kpe, gbenda u i kaha u ga yô,

¹⁶ sha u geman tar ve̱ hingir kwagh u cieryol, man kwagh u gbiren iwer a mi gbem sha won; hanma or u nan kar heregh yô, á cier nan iyol, nana jingir ityough.

¹⁷ Me sambe ve, er ka sha ahumbe a sha ityoughkitaregh nahan, sha ishigh ki mbaihomov vev. Me gema ijime a ve, Me ver ishigh sha a ve ga, sha iyange i kwaghbo a tser ve la.

¹⁸ Tsô ve kaa er: Va, sé hen nen kwagh u sé er Yeremia yô; gadia atindiakaa aa bee hen pristi ga, mhen kpaa una bee hen orfankwagh ga, kwaghôron kpaa una bee hen profeti ga. Va, sé za vihi nen un sha nombor; sé kera ver nen ishima sha ma kwaghôron na môm môm ga.

¹⁹ Ver ishima sha a mo, TERE, ungwa imo i mba ve mough num a mo la.

²⁰ Á er or kwagh u bo sha kwagh u dedoo u nan er la, shinii? Gadia ve time uma wam ihungwa i hônon. Umbur er m til sha ishigh You sha u ôron kwagh u dedoo sha ci ve, sha u geman a iyugh You sha a ve kera yô,

²¹ nahan yô, gema ônov vev na ijen, man shi na ve sha tahav mbu sanker; kasev vev ve̱ hingir aveve man shi ve̱ hingir kasev mba côgholov kpaa; noov vev ku u̱ wua ve, man ikaior vev sanker a̱ wua ve ken utya.

²² I̱ ungwa shisha vaa ken uya vev, zum u Ú va bur ve a ikumutya la, gadia ve time ihungwa sha u kôron mo, man ve hôn ityo sha u kôron angahar a am.

²³ Nahan kpaa, We, TERE, U fa mhen ve u ve hen sha u wuan mo la cii; de deen iferkwagh ve ga, man shi de esen isholibo ve kera sha ishigh You kpaa ga, ve gba sha ishigh You; er a ve sha ishima You, sha shighe u Ú yugh yô.