Yeremia 14 - ICIGHAN BIBILO

¹ Kwaghôron u TER u a ve hen Yeremia sha kwagh u icegh ki ki za la.

² Yuda ngu zungwen, ihindagar na hingir dang; ve tema inya hundughuu, mliam ma Yerusalem ma kôndon sha.

³ Ashagbaior a ve tindi mbayev vev shin mnger; ve va hen azôr, kpa ve zua a mngerem ga, ve hide a ikav vev gbilin; ve va ahenge, kunya kôr ve, ve yisa ityough vev.

⁴ Er inya ure sha ci u ura nôô sha tar la ga yô, mbashirensule va ahenge, ve yisa ityouv vev.

⁵ Ngôashim u ken toho kpaa mar wan, gema undu kera, sha ci u toho ngu ga.

⁶ Ujaki mba ken toho kpaa tile sha agungu a penem penem, mba ôôn fegh fegh fegh er ka ugbaseela nahan; yina ashe a ve iyol, sha ci u toho ngu ga.

⁷ Shin er aferakaa ase a lu pasen se nan se ibo, nahan kpaa, er kwagh sha ci u iti You TERE, gadia mbamhirjime asev ngee; ka We se er U kwaghbo ye.

⁸ We, ishimaverenkeghen i Iserael, Oryiman na, sha ayange a ican, ka nyi man U hingir er orvannya ken tar ne, man er or u nan dugh zende, u nan kaha nan yav tugh tseegh nahan?

⁹ Ka nyi man U hingir er or u i kondo nan iyol, er orageegh u nan fetyô u yiman or ga nahana? Nahan kpaa U ngu her atô wase TERE, mba yer se sha iti You; de undun se ga!

¹⁰ TER ngu ôron kwagh u ior mban kaan nahan er: Kape i doo ve u zenden wue wue je ne; mba her angahar inya ga; nahan TER kera rumun ve ga; hegen yô, Una umbur iferkwagh ve, man Una tsaha asorabo a ve.

¹¹ Shi TER kaa a mo er: De kera eren msen sha ci u ior mban, i̱ kpe ve iyol ga.

¹² Vea hôron kwaghyan kpaa, Me ungwan mliam vem ga; man vea naan nagh ku nanden kua ku sha samuyia kpaa, Me rumun ve ga; Me tim ve sha sanker, man sha ijen, kua sha bouange kpaa.

¹³ Tsô m kaa mer: Ku! Tere AÔNDO! Nenge, uprofeti mba kaan a ve er: Ne nenge a sanker ga, man shi ijen kpaa ga, kpa Me na ne bem u mimi hen ijiir ne.

¹⁴ Nahan TER kaa a mo er: Uprofeti mba pasen kwagh ken iti Yam sha aie; M tindi ve ga, M na ve zwa ga, M ôr kwagh a ve kpaa ga; mba pasen ne kwagh nengen a mi, u aiegh, man mtsengeôron u gbilinigh kua icugh i ken asema ve.

¹⁵ Nahan TER ngu kaan nahan er: Sha kwagh u uprofeti mba ve pasen kwagh ken iti Yam, man M tindi ve ga, mba ve kaan er: Sanker man ijen vea lu ken tar ne ga ne: Ka sha sanker kua ijen á tim uprofeti mbala ye.

¹⁶ Ior mba ve lu pasen ve kwagh la kpaa, á haa ve kera sha igbenda i Yerusalem sha ci u ijen kua sanker; or u iin ve kpaa nana lu ga, ve man kasev vev man ônov vev mba nomso kua mba kasev: kape Me gema afer a ve Me haa ve iyol la.

¹⁷ Yô kaa ve imo ne, wer: Ashe am a̱ haa mliam tugh man tetan, a̱ de memen ga; gadia i vihi iniunkwase, wankwase u ior av sha mvihi u vesen je, kwaghbo tser un tsung.

¹⁸ Ka mea za ken toho, nenge, mba i woo sha sanker mban! Mea hide ken gar kpaa, nenge, mba ve gbe ijen mban! Profeti kua pristi je kpaa mba zenden sha tar tsô, ve hingir tumbuluu.

¹⁹ U venda Yuda elegh elegh jee? Shion je kpaa ndôhôr we ishimaa? Ka nyi man U gbidi se je, mwar a kera lu se ga nahana? Mba veren ashe er, bem a̱ va, kpa ma kwagh u dedoo va ga; man sha ayange a mwar, kpa nenge, gema ka mkondoyol.

²⁰ TERE, se mba rumun kwaghbo wase kua ifer i uter asev; gadia se er U kwaghbo.

²¹ De te se kera ga, sha ci u iti You; man shi de heen ikônough ki torough You ki icivirigh ga; shi umbur, de saghen ikuryan You a vese ga.

²² Agbilinakaa a atôatyev la, ma kwagh ngu ker, u una fatyô u nôôn ura kpa? Shin Usha fatyô u nôôn ura u ioo kpa? Kera ka We gaa, TER, Aôndo wase? Nahan yô, sé kegh U; gadia ka We je U er akaa ne cii ye.