Yeremia 10 - ICIGHAN BIBILO

¹ Ungwa nen kwaghôron u TER, u A er a ven yô, ya u Iserael;

² TER ngu kaan nahan er: De henen nen gbenda u akuraior ga; man asema a̱ de nyian ne sha uivande mba sha kwavaôndo la ga, gadia asema nga nyian akuraior sha ci ve.

³ Gadia akaawan a akuraior ka gbilinkwagh; gadia ka kon u or nan gber ken ikô, ka tom u sha ave a ortom sha ijembe je la.

⁴ Ve cir u azurfa iyol kua zenaria; ve mande u ukusa sha mbamtalega sha er ua tenger ga yô.

⁵ Mba er ka kwagh u cien inyon a min ken sule nahan mba er kwagh ga; mba tee a tôô ve, sha ci u mba fetyô u zenden ga. De cie ve ga, gadia mba fetyô u eren kwagh u vihin ga, man shi kwagh u eren u dedoo kpa ngu her a ve ga.

⁶ Ma or môm ngu er We nahan ga TERE! We U hemba cii, iti You kpaa ngi a agee hemba cii.

⁷ Ka an je nana cia U ga, We Tor u akuraioro? Gadia We U kuma; gadia mbafankwagh mba akuraior cii, kua icivir i utor vev cii, ma or môm ngu er We nahan ga.

⁸ Kpa ve imôngo cii, ve lan kwagh ve bume; ityesen i ieev ka kon tsô.

⁹ Azurfa u i cagh un ka i va a mi ken Tarshishi je, man zenaria ken Ufashi, tom u orfan tomaveegh man u sha ave a orvarenzenaria; akondo a mbi ka a kwel man a nyian dindee, mbi cii ka tom u ior mba fan eev je.

¹⁰ Kpa TER yô, ka Aôndo u mimi je; Un ka Aôndo u uma je man shi ka Tor u tsôron gbem sha won; sha iyugh Na yô, tar tenger, man akuraior fatyô u kundun ishima sha ishimavihin Na la ga.

¹¹ Kaa nen ve nahan ner: Mbaaôndo mba ve gbe Sha man tar ga yô, vea saa ishe shin tar man sha won cii kpaa.

¹² U A gbe tar sha tahav Nav, man A ver tar sha won sha kwaghfan Na, man A samber Usha sha mkav Na,

¹³ ka Una ôr kwagh yô, mngerem ma hura sha Usha; ka A er turugh a due ken akighiratar a kôndo sha; A er inyiar sha ci u ura, man A due a ahumbe ken ayou a Na a koson akaa ker.

¹⁴ Hanma or nan hingir orlanenkwagh, nan ban a mfe; hanma or u nan eren tom sha zenaria nan va ahenge sha ieev mbi nan mbi gban a gba la; gadia ieev mbi nan mbi keren a ker mbila ka kwagh u icughugh je, ma iôôn ngi ken mbi ga.

¹⁵ Mbi gbilin tsô, ka tom u icughugh; sha shighe u mtsaha u mbi yô, mbia saa ishe.

¹⁶ Kpa kwar u Yakob ngu er mbi nahan ga; gadia Un ka Ormaan u akaa cii; Iserael ka nongo u u lu dyako Na je yô; TER u akum a Sha ka iti Na je la.

¹⁷ Kura ikav you hen inya kera, we u i kase u sha utya ne.

¹⁸ Gadia TER ngu kaan nahan er; Nenge, Me ta mba ve tem ken tar ne kera, sha shighe ne, Me na, ishima ia nyian ve je, vea fa i dedoo.

¹⁹ Kpe ahii! sha ci u mvihi u i vihim ne! Ivav yam vihi je; kpa m kaa mer: Mimi je kwagh ne ka ican i tsung je, me wa ishima a i.

²⁰ Tenti wam vihi kera, ikor yam cii kpa tôndo; ônov av due her a mo kera, kera mba ga; mô kera ngu u nana samber tenti wam, man nana zeren akondo a tenti ga.

²¹ Gadia mbakuranilev hingir mbalanenkwagh, ve kera ker TER ga, nahan ve er kwagh sha mfe ga, uzendenya vev cii kpaa sambe kera.

²² Ungwa, aun! Angara van keela; ayôôso a vesen je nga van ken tar u imbusutarimese la, sha u va geman agar a Yuda hingir atse, ijiir i tsan i ugbaseela.

²³ TERE, m fa, gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga.

²⁴ TERE, tsaham, kpa i̱ lu akuma akuma; i̱ de luun sha iyugh You ga, sha er u̱ de gemem m̱ hingir kwagh u ikoogh ga, ga.

²⁵ Haa ishimavihin You sha akuraior a a fe U ga yô, man sha icombor i i yer sha iti You ga la; gadia ve ya Yakob puru, een, ve ya un, ve bee un, ve tim ijiir na kera.