Yeremia 1 - ICIGHAN BIBILO

¹ Akaaôron a Yeremia, wan u Hilkia, u ken upristi mba ve lu ken Anatoti ken tar u Benyamin;

² u kwaghôron u TER va her a na sha ayange a Yoshia wan u Amon, tor u Yuda, sha shighe u anyom a na a tor kuma pue kar atar la.

³ Shi a va sha ayange a Yehoyakim wan u Yoshia, tor u Yuda, zan zan mbee u inyom i sha pue kar môm i Sedekia wan u Yoshia, tor u Yuda, zan zan je ar sha shighe u i yem a Yerusalem uikangen sha uwer u sha utaan la.

⁴ Yô, kwaghôron u TER va her a mo, er:

⁵ Er M lu a er u ken uya ga je tsô, M fa u, er u lu a due ken uya ga je tsô, M tsegha u; M ver u profeti u akuraior je.

⁶ Tsô, m kaa mer: Uwu! Tere, AÔNDO! M fa u ôron kwagh dedoo ga, gadia mo m ngu wanye je.

⁷ Kpa TER kaa a mo er: De kaan wer: M ngu wanye, ga; gadia hanmô u Me tindi u her a nan yô, ka hen nan ú za ye, man hanma kwagh u Me kaa u yô, ka wen ú ôr ye.

⁸ De cie ve ga; gadia M ngu a we sha u yiman we, kape TER A kaa ne.

⁹ Tsô TER naregh uwegh Nagh bendem sha zwa; man TER kaa a mo er: Nenge, M ver akaaôron Am ken zwa wou;

¹⁰ nenge, nyian M ver u sha akuraior man sha ityartor, sha u wuhen man u yôhôl, u timin man u vihin kera, u maan man u lôôn.

¹¹ Man shi kwaghôron u TER va her a mo, er: Yeremia, ka nyi u nenge a mini? M kaa mer, m ngu nengen a gbough ku kon u amondi.

¹² Nahan TER kaa a mo er: U nenge vough, ishima ngim per sha kwaghôron Wam sha u Me kure un vough yô.

¹³ Kwaghôron u TER shi va her a mo u sha kwa har; er: Ka nyi u nenge a mini? M kaa mer: M ngu nengen a ityegh ki ki toor yô; ki due vegher u ken imbusutarimese.

¹⁴ Tsô TER kaa a mo er: Ka ken imbusutarimese man kwaghbo una due fese una va tser mba ve tem sha tar ne cii ye.

¹⁵ Gadia, nenge, Me yila icombor i ityartor i ken imbusutarimese cii, kape TER A kaa ne; vea va di je, hanmô ve nana ver ikônough ki ijirigh ki nan hen ihindagar i Yerusalem cii, man hen ugilgar nav cii á ningir á tser, man hen agar a Yuda cii.

¹⁶ Me ôr ijir Yam a ve sha aferakaa a ve cii, sha ci u ve tem kera, ve nande mbaaôndo mbagenev nagh, man ve gure ve civir tom u sha ave ve la.

¹⁷ Ahegen yô, we, fiir ikondo shin iwenge, mough sha, ôr ve kwagh u Me kaa u cii; de yen ishima sha ishigh vegh ga, sha er M̱ de ne u ishima i yinan sha ishigh vegh ga yô.

¹⁸ Gadia, nenge, Mo je, M gema u nyian, u hingir garutya man ityôgh ki iyôgh man ugilgar mba togula, sha tar ne cii, man sha utor mba Yuda, man atiator a na, man upristi nav, kua ior mba ken inya la.

¹⁹ Vea ta num sha a we, kpa vea hemba u ga; gadia M ngu a we sha u yiman we, kape TER A kaa ne.