Yakobu 5 - ICIGHAN BIBILO

¹ Man ne mbanyarev yô, vaa nen, ngor nen kwelegh sha akaa a vihin a aa va tser ne la.

² Inyarev yenev hôô ve, akondo a en kpaa ivina ndiar a ve.

³ Zenaria wen kua azurfa wen ta nduran ve, man nduran ve la ua er ne shiada u bo ua hia ayol a en er ka usu nahan je. Ne mba ombon akaa, man ka ayange a masetyô je.

⁴ Nenge mba ve yar sunda ken ishule yen yô, injar ve i ne ya la ngi genger imo. Ivaa i mbasundan kpaa i nyôr ken ato a Ter u akum a Sha.

⁵ Ishar haa ne iyol sha won, ne mba gbe yan akaa sha asaren a en tsô, ne koso asema a en je a kehe er ka sha ci u iyange i i ver sha u sôngon la.

⁶ Ne gba kuren kwagh u orperapera dang tsô ne wua un je, kera ngu hendan a ven ga.

⁷ Nahan anmgbianev, wa nen ishima zan zan m-ande u Ter. Nenge orsule ka nan kegh iyiagh ki taregh ki injaagh, nan wa ishima a mi zan zan ura u he man shi u masetyô u nôô sha mi.

⁸ Ne kpaa, wa nen ishima nahan, taver nen asema a en gadia m-ande u Ter mgbôghom ikua ikua je.

⁹ Anmgbianev, de gbe nen ahon ayol a en ga sha u i̱ de ne ne ibo ga yô. Nenge, Orjir va, ngu tilen sha hunda.

¹⁰ Uprofeti mba ve lu ôron kwagh ken iti i Ter yô, ve̱ lu ne ikav sha ican i yan man ishima i wan kpaa.

¹¹ Mba ve taver ishima yô, ka se yila ve ser, mba i saan ve iyol. Ne ungwa er Yobu a taver ishima yô, man shi ne nenge mkur u Ter kure kwagh na yô, mhôônom ma ker Ter man shi zungu mhôônom kpaa.

¹² Kpa kwagh u a hembe cii yô, anmgbianev av, de bumun nen ga, shin a lu sha kwavaôndo shin a lu sha tar shin mbum ugen kpaa ga, kpa “een” wen yô, a̱ lu “een” man “ei” wen kpaa shi a̱ lu di “ei” je, sha u né va gba ken ibo i yan ga yô.

¹³ Ican i tser ma orgen ken a vene? Yô, nana̱ er msen. Orgen nan ngu saan saana? Yô, nana̱ wa icam i iember.

¹⁴ Orgen ken a ven nan ngu uangea? Nana̱ yila mbatamen mba nongo u Kristu, ve̱ er msen sha ci u nan, ve̱ shighe nan mkurem ken iti i Ter.

¹⁵ Msen u sha jighjigh u nan la una yima oruange la man Ter Una mough a nan sha. Aluer nan er isholibo je kpaa, á de nan.

¹⁶ Pase nen akaabo a en ayol a en, shi er nen msen sha ci u ayol a en sha u angev mbu̱ bee ne yô. Msen u eren tsung u orperapera ngu a agee kpishi je.

¹⁷ Eliya lu or di inja i môm a vese tsô, a er msen tsung er ura u̱ de nee ga, man ura kera nôô shin tar ga, kuma anyom atar man iwer ataratar.

¹⁸ Man a shi a er msen, nahan Aôndo nôô ura, inya hire mende iyiav mbi i.

¹⁹ Anmgbianev av, aluer mô wen nana kaha á undu mimi man orgen nana za hide a nan yô,

²⁰ fa nen, or u nan ker orsholibo sha gbenda u mtsum u nan la nan hidi a nan yô, nan dugh uma u nan ken ku kera shi nana cir asorabo kpishi.