Yakobu 2 - ICIGHAN BIBILO

¹ Anmgbianev av, de lu nen a jighjigh u nan u hen Ter wase Yesu Kristu Ter u iengem la, a msange u sha dooshima imôngo ga.

² Gadia aluer or u nan we ikunya i zenaria sha ave kua riga u icivirigh nana va nyôr ken mkohol wen, man shi icanor nana va nyôr a ajav iyol yô,

³ ne gema ne kenger or u nan hee riga u icivirigh la ne kaa a nan ner: We yô, ikagh ki teman ki dedoo kin, kpa ne gema ne kaa a icanor la ner: We, tile keela, shin: Va tema shin ankwagh wam u pendan angahar sha mi ne—

⁴ kera ka mpav ne nyer a mi ken atô wen gaa? Man shi ne kera hingir mbaajiriv mba ve henen aferakaa gaa?

⁵ Ver nen ato, anmgbianev av mba doon mo ishima, Aôndo kera tsuwa mbaatsanev mba ken tar ne sha u ve̱ lu mbanyarev ken jighjigh u nan man shi mbayandyako u tartor u A tende zwa a mba Un doo ve ishima la gaa?

⁶ Kpa ne yô, ne hee a hee icanor je. Kera ka mbanyarev man ve lu eren a ven sha apera ve tul ne, ve yemen a ven ken ijir ye gaa?

⁷ Kera ka ve je ve lu tuhwan iti i doon i i yer ne a mi la ye gaa?

⁸ Kpa aluer nea wa tindi u tartor iko mimi er i nger ken icighanruamabera nahan er: Or u nan we ndor a we, nana̱ doo u ishima er we iyol you nahan yô, ne er doo.

⁹ Kpa aluer ne sange sha dooshima yô, ka isholibo ne eren ye, tindi una na ne ibo er, ne mba mbaperenatindi.

¹⁰ Gadia or u nan we atindi cii iko kpa nana nôngo gbev sha ankwagh môm tsô yô, nan hingir u lun a ibo sha mi cii kera ve.

¹¹ Gadia Un u A kaa er: De eren idya ga, la, shi A kaa er: De woo or ga kpaa. Nahan yô, aluer u er idya ga, kpa u gema u wua or yô, u hingir or u peren tindi je ve.

¹² Ôron nen kwagh shi eren nen kwagh er ka mba á va ôr ve ijir sha tindi u a pase a toho la nahan.

¹³ Gadia or u nan zungu mhôônom ga yô, ijir kpaa ia zungwe nan mhôônom ga, gadia mhôônom ma zungwen ma hemba ijir agee.

¹⁴ Anmgbianev av, aluer ma or nana kaa er nan ngu a jighjigh u nan je, kpa nan lu a aeren ga yô, ka a inja sha nyi? Jighjigh u nan la una fatyô u yiman nan je kpa?

¹⁵ Aluer ma anmgbian u nomso shin u kwase idyelegh á kôr nan, nan kera lu a kwaghyan u nana ya ayange ayange ga,

¹⁶ man mô wen nana kaa a ve er: Yem nen bem bem, i̱ tsee ne iyol, ide nen, kpa ne kera na ve kwagh sha ugbayol vev ga yô, ka a inja sha nyi?

¹⁷ Kape jighjigh u nan kpaa, aluer ngu a aeren ga yô, un iyol na una lu kpenegh je la.

¹⁸ Orgen nana kaa er: We yô, u ngu a jighjigh u nan, kpa mo yô, m ngu a aeren. Tesem jighjigh wou u nan u aeren a lu sha mi ga la, man mo di me tese u jighjigh wam u nan sha aeren a am.

¹⁹ U na jighjigh wer, Aôndo ngu môm zee? U er doo. Ujijingi mba bov je kpaa mba ne kwagh la jighjigh, ikarikase gem gbidi ve iyol.

²⁰ We orlanenkwagh ne, sar u ka fan er jighjigh u nan u lun a aeren ga la a lu kpenegh kpa?

²¹ Kera ka sha aeren man i na Aberaham ter wase ishô zum u a na nagh sha wan na Isaka sha atse a nanden nagh sha mi la ye gaa?

²² U nenge er jighjigh u nan a lu eren tom a aeren a na imôngo, nahan jighjigh u nan hingir vough sha aeren la.

²³ Nahan icighanruamabera kure sha mi vough u a kaa er: Aberaham na Aôndo jighjigh nahan A gema kwagh la hingir perapera na je la, man shi er: I yila un er ikar u Aôndo la.

²⁴ Ne nenge, ka sha aeren ka i na or ishô ye, ka sha jighjigh u nan tseegh ga.

²⁵ Rahabi, agbagakwase la kpaa, kape i na un ishô sha aeren je la gadia a nyôr a mbatyomov man a due a ve sha gbenda ugen kposo.

²⁶ Gadia er iyol i lun a jijingi ga i lu kpenegh yô, kape jighjigh u nan u lun a aeren ga di kpaa, a lu kpenegh nahan la.