Upasalmi 98 - ICIGHAN BIBILO

¹ Wa nen TER icam i he, gadia A er akaa a kpilighyol je; uwegh Nagh ku yanegh man icighanikasewe Na, na Un mhembe.

² TER pase myom Na, A tese perapera Na ken igbar sha ishigh ki akuraior;

³ A umbur erdoo Na man jighjigh Na a ya u Iserael, akighir a tar cii nenge myom u Aôndo wase.

⁴ Ember TER, we tar cii; ger, wa nen icam a iember, een, wa nen atsam a wuese.

⁵ Wa nen atsam a wuese TER, sha adiguve, sha adiguve man icam i wan genger genger,

⁶ sha ukakaki man mkaa u kor; ember nen sha ishigh ki Tor, ka TER je la.

⁷ Zegemnger a̱ hura, man m-iv na kpaa, tar sha won cii kua mba ve tem sha u kpaa.

⁸ Uifi ve̱ kure ave, iwo kpaa i̱ wa icam, i̱ ember imôngo

⁹ sha ishigh ki TER, gadia ngu van u va ôron tar ijir; Una ôr tar ijir sha perapera, man akuraior kpaa sha mimi.