Upasalmi 97 - ICIGHAN BIBILO

¹ TER tema tor; yô, tar u̱ ember tsung; i̱ doo ityar i hen kpezegemnger la cii iyol.

² Abeen man angôghime kase Un wa atô; perapera man ijirôron i mimi ka ve, ve lu imagh ki ikônough Nagh ki torough ye.

³ Usu ngu zan Un sha hemen, ngu hian mbaahendanev Nav mba ve kase Un yô.

⁴ Inyiar Na wanger sha won cii; tar nenge yô, u gbidye akarkase iyol.

⁵ Iwo sough er tsur nahan sha ishigh ki TER, sha ishigh ki TER u tar cii.

⁶ Usha mba pasen perapera Na, ior cii kpaa nenge iengem Na.

⁷ Mba ve civir ieev cii, ve va ahenge, mba ve manger sha agbilinakaa la; mbaaôndo cii mba gur mba civir Un.

⁸ Shion ungwa, nahan doo un, ônkasev mba Yuda mba ember sha ajiraôron a Ou, TERE.

⁹ Gadia We, U ngu Uhembansha sha tar cii, TERE! I kende U sha, kar mbaaôndo mbagenev ca je!

¹⁰ Ne mba TER A doo ne ishima yô, kôr nen kwaghbo ihom. Un koson uuma mba mba i doo Un a ve la, A yima ve sha ikev i mbaaferev.

¹¹ Mba samber a iwanger sha ci u mbaperapera, man msaanyol sha ci u mba ve lu a ishima i mimi yô.

¹² Ember nen ken TER, ne mbaperapera, sugh nen icighanti Na. Ka Pasalmi