Upasalmi 90 - ICIGHAN BIBILO

¹ TERE, ka We je, U lu ijiir yase i teman, sha ikov ikov ye.

² Er i lu a due a iwo ken igbar ga, man er U lu a gba inya man tar ga, hii sha uicôrombaashighev je zan zan gbem sha won, U ngu Aôndo.

³ Ka U gema or, nan hingir vuulevu; U kaa wer: Hide nen ijime, ne ônov mba iorov!

⁴ Gadia anyom dubu her a We yô, nga er sev mbu nyenev mbu mbu kar la yô, man er mkorutu môm nahan.

⁵ Ka U kar a ve kera er ka sha ikuwanmnger nahan; ve mba er mnyam nahan, pepe yô, ve mba er toho u u menden yô;

⁶ pepe yô, ka u mende doo doo, u vese, aikighe yô, i tôndo u kera, u use.

⁷ Gadia se saa ishe sha ishima You i vihin, kondo se iyol sha iyugh You kpaa.

⁸ U ver aferakaa ase sha ishigh You, asorabo ase a ken myer kpaa, U ver a ken iwanger i ishigh You.

⁹ Gadia ayange ase cii nga karen been sha iyugh You, anyom ase nga karen been er ishimashirin nahan.

¹⁰ Ayange a anyom a ase kuma anyom akunduatargber, man aluer ayol ase aa taver kpishi yô, a kuma akunduanyiin je; nahan kpaa ihagh i a yô, ka zayol man ishima i vihin, gadia nga a kar fefa, se kpaa se kar kera wase.

¹¹ Ka an nan fe agee a ishimanyoon Youwe? kua iyugh You i sha inja i mciem ma ma kom u á cia U laa?

¹² Tese se se̱ fa er i doo u ma se ôr ingeegh ki ayange ase sha u sé zua a ishima i fan kwagh yô.

¹³ TERE, hide, shi nan je? mhôônom ma kôr U a mbayev Ou.

¹⁴ Na erdoo Wou a̱ kuma se pepe, sha er sé ember, á saan se iyol sha ayange ase cii yô.

¹⁵ Na, i̱ saan se iyol er sha ayange a U na se ican la nahan vough, man er anyom a kwaghbo a tser se la nahan.

¹⁶ Tom Wou ma u dugh ken igbar hen mbayev Ou, man iengem You kpaa sha ônov vev.

¹⁷ Mdoom ma TER Aôndo wase; ma lu a vese, taver tom u ave ase sha a vese, een, tom u ave ase la, taver u.