Upasalmi 88 - ICIGHAN BIBILO

¹ TERE, Aôndo u myom wam, tetan m yilan mer i̱ wasem, tugh kpaa m lu sha ishigh You.

² Msen wam a̱ nyôr her a We, ver ato, ungwa mliam am,

³ gadia atsan ivim ken vanger, uma wam kpaa zulum a Sheol.

⁴ Mba nengen mo er m ngu ken mba ve sen shin ihungwa la yô; m ngu er or u nan lu a iwasen ga yô;

⁵ u i te kera hen mbakpenev, man er mba i woo ve, mba ve lu shin uwar, mba U kera umbur ve mayange ga yô, i pav ve a iwasen i sha ikev You kera.

⁶ U gbirim shin ihungwa i zan kweng, ken ajiir a imegh, shin aiv.

⁷ Iyugh You yuhwam kighir mo inya; u erem ican sha agôndoamnger Ou cii. Sela.

⁸ U pavem a mba m fe ve la, U ver ve ca je, U erem m hingir ve kwagh u ndôhôrshima; i wuhem, m fetyô u duen ga.

⁹ M hungwa ashe ikôl sha ican; hanma iyange m yer U TERE, m naregh ave her a We.

¹⁰ Ú er tom u kpilighyol sha ci u mbakpenev kpa? Mba ve saa kera la vea shi á mough, á wuese Wee? Sela.

¹¹ Á pase erdoo Wou shin uwara? shin jighjigh Wou ken mtimi?

¹² Á fa akaa a Ou a kpilighyol ken ime? man perapera Wou kpaa ken tar u mhungulu?

¹³ Kpa mo yô, m ngu yilan We TERE, pepe msen wam ka a va sha ishigh You.

¹⁴ TERE, ka nyi U tem kera? Ka nyi U yerem ishigh Youwe?

¹⁵ Hii iyev je ican lu eren mo, m zulum a ku; er akaa a Ou a cier mo iyol yum yô, kundam iyol.

¹⁶ Iyugh You i tsung la i haam sha ityou; akaa a Ou a cier iyol timim kera,

¹⁷ a kasem er mngerem nahan iyange jimin cii, a yisam hanma ian cii.

¹⁸ U paven a or u doon mo ishima man ijende yam, U ver ve ca je; mba m fe ve kpaa mba ken ime. Ka ityesen i Etan, Oresera