Upasalmi 85 - ICIGHAN BIBILO

¹ TERE, doo U a tar Wou, U hide Yakob a mkpeyol na la.

² U de ior Ou ifer ve, U cir isholibo ve cii kpaa. Sela.

³ U hile a iyugh You kera cii, U gema U de mvihi u ishimavihin You la.

⁴ Aôndo u myom wase, hide a vese; de ishimanyoon You a vese la.

⁵ Ú zer yuwen se gbeme? Ú zaan hemen a ishimanyoon You la zan zan sha ikov ikov jee?

⁶ Ú shi Ú na se uma er ior Ou ve̱ ember ken We gaa?

⁷ Tese se erdoo Wou, TERE, na se myom Wou.

⁸ Me ungwa kwagh u Aôndo TER Una kaa yô, gadia ôron Na kwagh u bem a ior Nav, man a ior mba i doo Un a ve la; kpa ve̱ de kera shi hilen ken ibume ga.

⁹ Mimi je, myom Na ngu ikua ikua a mbacian Un, sha er iengem ma i lu ken tar wase yô.

¹⁰ Erdoo man mimi ve zua ve, perapera man bem suse zwa ayol a ve,

¹¹ mimi ngu duen shin inya, perapera tema sha kwavaôndo shir ashe shin.

¹² TER Una na kwagh u a lu u dedoo, man tar wase ua doo iyiagh ye;

¹³ perapera una zaan Un sha hemen, una sôron angahar a Na gbenda. Ka msen u Davidi