Upasalmi 84 - ICIGHAN BIBILO

¹ Ijiir You i teman doo je, gande, We TER u akum a Sha.

² Ityembe i sha ishigh ki iyou i TER sarem ken ishima je, iyol i kpem cii; ishima yam man iyol yam ngi ember Aôndo u uma genger genger.

³ Een, atsator zua a ijiir na i tsan, man gbargbar kpaa wa iya na, i una tsev ônov sha mi yô: ka hen atse a Ou a nanden nagh sha mi, TER u akum a Sha, Tor wam man Aôndo wam kpaa.

⁴ Saan mba ve tem ken iyou You iyol, mba wuese We gbem. Sela.

⁵ Saan or u agee a nan a lu ken a We la iyol, u uigbudu mba zan sha Shion ve lu nan ken ishima yô.

⁶ Zum u vea karen hen pev u ombor yô, ve gema a mi hingir ijiir i imbormnger i saar her; mngerem ma urahe ma iv un a iveren.

⁷ Er ve zan yô, ve seer taver a taver agee; hanmô ve nana va ar sha ishigh ki Aôndo ken Shion.

⁸ TERE, Aôndo u akum a Sha, ungwa msen wama! Aôndo u Yakob, shi ver ato. Sela.

⁹ Aôndo, perutya wase, shi nenge; nenge ishigh ki un u U shigh un mkurem la.

¹⁰ Gadia sev môm sha ityembe i sha ishigh ki iyou You yô, hemba dubu; hemba doon mo u ma m lu orkuranhunda ken iyou i Aôndo wam a u ma m lu ken utenti mba ifer la.

¹¹ Gadia TER Aôndo ka iyange man perutya kpaa; TER Una na mrumun u sha mhôôn man icivir; Una nyume mbazan jighilii la ma kwagh u dedoo ga.

¹² TER u akum a Sha, or u nan suur sha a We yô, saan nan iyol. Ngun ka sha ci u orhemen u mbawanatsam. Ka Pasalmi u ônov mba Kora