Upasalmi 80 - ICIGHAN BIBILO

¹ We, Orkuran u Iserael, ver ato, We u U hemen Yosev er ikumuile nahan; We u U tem sha ucerubi, mondo er iwanger nahan.

² Kpoghol agee Ou sha ishigh ki Eferaim man Benyamin kua Manase; va, va yima se.

³ Aôndo, hide a vese; er, ishigh You ki̱ wanger, se̱ war.

⁴ TERE, Aôndo u akum a Sha, shi nan je man ishima ia de vihin We a msen u ior Ouwe?

⁵ U koso ve sha ruam u mlia, U na ve mliam, ve ma kpishi.

⁶ U gema se se hingir kwagh u akpelanegh hen mba ve we ndor a vese; mbaihomov asev kpaa mba sen.

⁷ Aôndo u akum a Sha hide a vese; er, ishigh You ki̱ wanger, se̱ war.

⁸ U due a kon u wain ken Igipiti, U va a mi, U zenda akuraior kera, U gema U môôr u,

⁹ U sôr u ijiir; u ta amise gbang gbang, u iv tar la;

¹⁰ u gba uwo mure, kua usedar mba Aôndo kpaa, sha agbaa a u;

¹¹ u ta agbaa a u zan zan ar shin kpe u zegemnger, azengel a u kpaa ar shin Ifi je.

¹² Ka nyi man U yôhôl igyar i u je, mba ve karen hen gbenda la cii, ve zer u nahana?

¹³ Swam u shin gbor ngu va vihin u, inyam i ken toho kpaa ngi yan u.

¹⁴ Aôndo u akum a Sha, shi hide, shir ashe shin, nenge, wa kon u wain ne iko,

¹⁵ kwagh u uwegh Ough ku yanegh ku môôr ne, man wan u U koso un sha ci Wou iyol You la.

¹⁶ I nande u sha usu, i gber u; mba saan ishe sha myugh u ishigh You.

¹⁷ Uwegh Ough ku̱ cir or u a lu U or u sha uwegh ku yanegh la, ka wan u or u U koso un sha ci Wou iyol You je la.

¹⁸ Nahan yô, sé kera gema ijime sé undu U ga; na se se̱ lu uma, nahan sé yila sha iti You.

¹⁹ TERE, Aôndo u akum a Sha hide a vese; er, ishigh You ki̱ wanger, se̱ war. Ngun ka sha ci u orhemen u mbawanatsam; i ver un sha ikenge i Gititi. Ka Pasalmi u Davidi