Upasalmi 77 - ICIGHAN BIBILO

¹ M genger imo m yila Aôndo, m vaa; m genger imo m yila Aôndo, Una ver ato her a mo.

² Sha iyange i ican tserem la, m ker Aôndo, m naregh uwegh tugh, m shil ku ga, ishima yam kpaa rumun er i̱ sur i ga.

³ Zum u m umbur Aôndo yô, m toghor ken ishima, zum u m henen ken ishima yô, jijingi wam ure. Sela.

⁴ U kôrom akurashee sha er a̱ lu ivegher yô; ishima nyian mo je, m kera fatyô u ôron kwagh ga.

⁵ M hen kwagh u ayange a ngise la, kwagh u anyom a tsuaa la.

⁶ M umbur icam yam i utu la, m hen ken ishima yam, man jijingi wam time kwagh tsung kpaa:

⁷ Ter Una gbihi kera gbeme? Una kera shi er erdoo Na ga?

⁸ Erdoo Na bee kera purututu jee? Ityendezwa Na kpaa bunde kera gbem sha wono?

⁹ Shin hungul Aôndo u zungwen mhôônom ase? Sha iyugh Na la, A cir mhôônom Nam ma kôrono? Sela.

¹⁰ Tsô m kaa mer: Ka kwagh u nzughul mo ne, er uwegh ku yanegh ku Uhembansha ku gem kposo yô.

¹¹ Me ter aeren a TER; een, me umbur akaakpilighyol a Ou a sha ayange a tsuaa la.

¹² Me hen kwagh kpaa sha tom Wou cii; me hen kwagh ken ishima sha aeren a Ou.

¹³ Aôndo, gbenda Wou ngu ken icighanjiir; ka an je, nan lu Aôndo u vesen er Aôndo nahana?

¹⁴ Ka We, U lu Aôndo u U eren akaa a kpilighyol ye; U pase ior agee a Ou, ve fa.

¹⁵ Ka sha uwegh ku ageegh U paa ior Ou ye, ka ônov mba Yakob man mba Yosev je la. Sela.

¹⁶ Aôndo, mngerem nenge a We, mngerem nenge a We, yô, ma cia, aiv kpaa gbidye akarkase iyol.

¹⁷ Abeen a sha, ndoor ura, kwavaôndo dura, avaan a Ou kpaa tsenda.

¹⁸ Imo i mdor Wou lu ken hiar, inyiar kpishi wanger tar, tar tenger, er ngigh ngigh.

¹⁹ Gbenda Wou lu shin zegemnger, igbenda You lu shin uzegembamngerev kpaa, angahar a Ou kpaa, i kera nenge a min ga.

²⁰ U hemen ior Ou er ikumuile nahan, sha ikev i Mose man Aron. Ka ityesen i Asav