Upasalmi 7 - ICIGHAN BIBILO

Shigayon u Davidi u a wa sha u civir TER; lu sha ci u akaaôron a Kushi, Orbenyamin la

¹ TERE, Aôndo wam, ka sha a We m suur ye; yimam sha ikev i mbazendan mo ityô cii, warem,

² sha er a̱ de tusen a mo, er begha ka a tuse a kwagh, orwasen a kera lu ga, nahan ga.

³ TERE, Aôndo wam, aluer m er nahan, aluer ifer ia lu sha ave am yô,

⁴ aluer m or or u doon a mo iyev i ifer —mimi je, un u a gbe moughon num a mo a ityôikaa ga la, m yima un—

⁵ orihom wam a̱ zendam ityô, a̱ kôrom je, a̱ ndyar uma wam angahar hen inya, a̱ gbihi icivir yam shin vuulevu je. Sela.

⁶ Mough sha a ishima i vihin You TERE, kegh iyol i num sha iyugh i mbaahendanev av; nder sha ci wam, We, u U kaa wer, i̱ ôr ijir sha mimi!

⁷ Mkohol u akuraior a̱ kase U; tsô Ú hide sha, Ú kar ve sha ityou.

⁸ TER er akuraior ijir; TERE, er a mi jighilii sha perapera wam, man shi sha mimi u a lu ken a mo kpaa.

⁹ Ifer i mbaaferev i̱ kure, kpa mbamimi yô, taver ve her, We u U karen asema man ahi kpaa, Aôndo u perapera.

¹⁰ Perutya wam ngu her Aôndo u A yem mba ve lu a mimi ken ishima yô.

¹¹ Aôndo ka orjir u mimi je, man ka Aôndo u yuwen ayange ayange.

¹² Aluer or á gema ishima ga yô, Una wua sanker Na; A henda ada Na, A kegh iyol;

¹³ A sôr ikav Nav mbi tswamev mbi kuuv; A er avaan a Na hingir er ka a usu yô.

¹⁴ Nenge, or ngu toghol mar sha ifer, nan jile iyol sha kwaghbo, nan gema nan mar aie.

¹⁵ Nan time ihungwa i kôron kwagh, nan vungur i kpaa, kpa nan gba shin akpa u nan tim la.

¹⁶ Kwaghbo u nan una hide sha ityough ki nan, ipila i nan kpaa ia sen nan sha ityo.

¹⁷ Me sugh TER sha mlu Na u perapera la; me wa icam i wuese iti i TER, Uhembansha.