Upasalmi 68 - ICIGHAN BIBILO

¹ Aôndo A̱ mough sha, mbaihomov Nav ve̱ sambe, mba ve ker Un ihom la, ve̱ yevese sha ishigh Nagh kera.

² Er ahumbe ka a kar a mnyim kera nahan, kape U kar a ve kera la; man er tsur ka u sough sha usu nahan, kape mbaaferev ve saa ishe sha ishigh ki Aôndo la.

³ Kpa mbaperapera mba ember, mba ember tsung sha ishigh ki Aôndo; een, mba ember tsung a msaanyol je.

⁴ Wa icam ter nen Aôndo, wa nen atsam a wuese iti Na; kaha nen igbudu a̱ tav sha, sha ci u Un u A zenden A karen ken udeserti la; iti Na er TER, ember nen tsung sha ishigh Nagh.

⁵ Aôndo ka ter u ancôgholov, man orjir u kasev mba côgholov, ken icighanyou Na la.

⁶ Aôndo ka A gema or u mtswen, nan hingir u lun a ior ken ya; ka A dugh mbakwarev, A na ve mkpeyol; kpa mbahembanato yô, ve tema ken tar u iombor.

⁷ Aôndo, zum u U due U hemen ior Ou, U zenden, U karen ken toho la, Sela

⁸ tar tenger ura kpaa nôô, sha ishigh ki Aôndo, een, Senai la je kpaa tenger sha ishigh ki Aôndo, Aôndo u Iserael la.

⁹ U na ura u nôô kpishi, Aôndo. U taver dyako Wou zum u a ver la,

¹⁰ nongo Wou u tema ker; sha mdoom Ou, Aôndo, ka U sôr kwagh sha ci u mbaatsanev.

¹¹ Ka Ter man A kaa imo Na ye; kasev mba ve yôôn loho u dedoo ka ikum i vesen.

¹² Utor mba akumautya mba yevese, mba yevese je; man kasev mba ve lu ken ya yô, mba karen ishar je.

¹³ Shin er ne yav ken atô u atôrauile la yô, i cir azurfa sha akper a atii, zenaria u ayaikure kpaa cir ingur i akper a na.

¹⁴ Zum u Uhembansha cii sambe utor keregh yô, senou gba ken Salmon.

¹⁵ Uwo u Bashan ka uwo u Aôndo je, uwo u Bashan ka uwo u zôngo zôngo je.

¹⁶ Ne iwo i zôngo zôngo ne, ka nyi ne kenger uwo u u sar Aôndo sha u u̱ lu ijiir Na i teman la, dang nahana? Een, TER Una tema sha u gbem je.

¹⁷ Akekeanyinya a Aôndo nga udubu ikundu je, een, udubu kwa udubu; Ter ngu ken atô u a, ka Senai ken icighanjiir.

¹⁸ U kôndo U yem Sha, U yem a mbakwarev uikangen, U ngohol uiwua hen ior, een, zan zan hen mbahendan kpaa, sha er TER Aôndo Una tema a ve imôngo yô.

¹⁹ I̱ wuese Ter u A tee se ayange ayange yô; ka Aôndo A lu myem wase ye. Sela.

²⁰ Aôndo wase ka Aôndo u yiman se acin imôngo je, iku i waren kpaa ka hen AÔNDO Ter i lu ye.

²¹ Kpa Aôndo Una hembe mbaihomov Nav ityouv, man shi ityough ki umen ki or u nan taver ishima ken ifer i nan la kpaa.

²² Ter kaa er: Me dugh ve ken Bashan, Me hide a ve, shi Me dugh ve shin aiv a zegemnger, Me hide a ve,

²³ sha er u̱ wa nguhar wou ken awambe yô, nombor u iwa you kpaa ua zua a kwar u u sha mbaihomov ou.

²⁴ Ve nenge zende Wou a ikumior You, Aôndo, ka zende u Aôndo wam man Tor wam a ikumior ken icighanjiir je la.

²⁵ Mbawanatsam hemen, mbakuhwandagh dondo, ve lu her atô u ônkasev mba kuhwan gbande.

²⁶ Wuese nen Aôndo ken mbamkohol, ka TER je la, ne mba ne dugh ken imbormnger i Iserael yô.

²⁷ Benyamin u kiriki, tor ve la, ngula; kua mbatarev mba Yuda man ikpelaior ve la; mbatarev mba Sebulon, kua mbatarev mba Nafetali kpaa.

²⁸ Aôndo wou A̱ kaa i̱ taver we agee; Aôndo, taver kwagh u U er sha ci wase la.

²⁹ Utor vea va na U iwua, sha ci u tempel Wou u a lu ken Yerusalem la.

³⁰ Yange inyamtoho i hen awoo ne, man ikum i anomabua a anibuav mba akuraior, ndyar ve shin angahar, ve mba inyaregh ki kpandegh ki doon ve yum la; sambe ior mba ityav mbi doo ve yô.

³¹ Ashagbaior aa due ken Igipiti; Etiopia una naregh ave hen Aôndo fefa.

³² Ne ityartor i sha won, wa nen icam ter nen Aôndo, wa nen atsam a wuese Ter, Sela

³³ u A zenden sha Usha mba ve hembe gban ca, mba ve lu tsuaa je yô; ungwa, A ôr kwagh sha imo Na, ka zegeimo je la!

³⁴ Wuese nen agee a Aôndo; icivir Na i hemban ngi sha Iserael, man agee a Na nga sha ikwavaôndo.

³⁵ Aôndo U cier iyol ken icighanjiir Wou; Aôndo u Iserael ne ior Nav agee kua tahav kpaa. I̱ wuese Aôndo. Ngun ka sha ci u orhemen u mbawanatsam; i ver un sha ikenge i: Ulôhô. Ka Pasalmi u Davidi