Upasalmi 63 - ICIGHAN BIBILO

¹ Aôndo, ka We U lu Aôndo wam ye, m ngu keren We, U sarem ken ishima er imurakôron nahan; U sar iyol yam tsung, ken tar u ombor u tseghe tseghe, ape mngerem ma lu ga yô.

² Kape m lu kenger We ken icighanjiir la, sha u me nenge agee Ou man iengem You kpaa.

³ Gadia erdoo Wou doo, hemba uma; zwa wam ua wuese We.

⁴ Kape me wuese We er m lu uma sha won je; ka ken iti You man me kende ave am sha ye.

⁵ Uma wam una ide er ka sha mshia man ahôm yô; zwa wam kpaa ua wuese We sha ityumbuzwaagh i ember tsung.

⁶ Zum u ka mea umbur We sha gambe wam yô, m hen kwagh Wou sha ashighe a mbamkor mba utugh la cii,

⁷ gadia We U lu Orwasen mo, ka ken mure u akper a Ou kpaa me ember tsung je ye.

⁸ Uma wam var a We ityô; uwegh Ough ku yanegh ku suwem.

⁹ Kpa mba ve keren uma wam sha er vea tim un yô, vea sen shin ajiir a zan a taregh.

¹⁰ Á gema ve a na sha agee a sanker; vea hingir kwar u ugbaseela.

¹¹ Kpa tor yô, una ember tsung ken Aôndo; hanma or u nan bumun Un yô, nana ta ihagh, gadia á cir zwa u mbaaiev. Ngun ka sha ci u orhemen u mbawanatsam. Ka Pasalmi u Davidi