Upasalmi 59 - ICIGHAN BIBILO

¹ Dughum sha ikev i mbaihomov av, Aôndo wam, kende a mo sha hen mba ve mough num a mo la.

² Dughum sha ikev i mbaerenafer, yimam sha ikev i mbahaan awambe.

³ Gadia nenge ase, mba meen uma wam; mbaageev kohol iyol u tan num sha a mo, ka sha ci u mkarkpe wam ga, man shi ka sha ci u isholibo yam kpaa ga, TERE,

⁴ shin er iferkwagh i lu ga kpaa, nahan kpaa, ve gber ayem, ve za wa ago iyol. Nder sha u wasen mo, man shi nenge kpaa!

⁵ We, TERE, Aôndo u akum a Sha, Aôndo u Iserael, mough sha, ôr atôatyev ijir, de kera zungwen ma or u ken mba ve eren akaabo sha atseregh la mhôônom ga. Sela.

⁶ Ka ve hide aikighe, ve eren imo er iwa yô, ve zenden ve ningir ken gar.

⁷ Nenge, ve kaa imbwase sha zwa ve, usanker mba ve sha ityumbujôôgh; gadia ka an nana ungwa? Kape ve kaan la.

⁸ Kpa We, TERE, Ú se ve; atôatyev cii, Ú nahan a tar.

⁹ We, agee am, me ver ashe We, gadia ka Aôndo je, A lu gôgôyou wam ye.

¹⁰ Aôndo wam Una keghem gbenda a erdoo Na; Aôndo Una rumun u me nenge isharen yam sha mbaihomov av.

¹¹ De woo ve ga, sha er á hungul ior av ga yô; sambe ve sha agee Ou, gbihi ve inya, TERE, perutya wase!

¹² Isholibo i ken zwa ve, ka kwaghôron u sha ityumbujôôgh ve. Yô, i̱ kôr ve sha imanger ve la, man sha ci u ityuhwanev vev man kwaghôron ve u aiegh u ve er la.

¹³ Tim ve sha iyugh, tim ve ve̱ saa sha won kera, ve̱ fa er Aôndo A tem tor sha ya u Yakob, zan zan i za ar hen akighir a tar je yô. Sela.

¹⁴ Shin vea hile aikighe, ve eren imo er iwa yô, ve zenden ve ningir ken gar,

¹⁵ ve hingir kera ke kera sha u zenden keren kwaghyan; aluer vea ide ga yô, ve tsa eren nahan.

¹⁶ Kpa mo yô, me wa icam i teren agee a Ou; een, pepe me wa icam me ember erdoo Wou, gadia ka We, U lum gôgôyou ye, ijiir yam i yeren sha iyange i ican i tserem la.

¹⁷ Ka We, agee am, me wa U atsam a wuese ye; gadia Aôndo ka gôgôyou wam, Aôndo u A eren a mo dedoo ne. Ngun ka sha ci u orhemen u mbawanatsam; i ver un sha ikenge i: Loho u Shiada. Ka icam i Davidi dugh sha u tesen ior, zum u a nôngo ityav a Mbaaram mba ken tar u Mesopotamia, man a Mbaaram mba ken tar u Soba, man zum u Yoabi hide, man a wua Mbaedom shin pev u Bar, ior dubu pue kar uhar la