Upasalmi 58 - ICIGHAN BIBILO

¹ Ne mbaaôndo, ne mba er kwagh sha mimi je kpa? Ne mba er ônov mba iorov ijir sha mimi kpa?

² Ei, ken ishima yô, ne mba eren kwagh u ifer, ne mba kar myohom ma ipila i sha ave a en la, sha tar je.

³ Mbaaferev due paleghaa ken uya je, er i mar ve je, tsô ve hii u tsumen sha aie u eren.

⁴ Megh vegh ku er megh ku iyôgh yô, mba er igbinde i i kondo ato a i yô,

⁵ i i we iko sha imo i mbanumben a i la ga, shin vea fa inyumbe ve nan nan kpaa.

⁶ Aôndo, oso ve anyi ken zwa kera, TERE, or anomanyiigh a agumabegha;

⁷ ve̱ sough kera er mngerem ma kuwan kera nahan; zum u una ulugh avaan yô, a̱ hingir er i tôndo a ijô kera yô;

⁸ ve̱ hingir er ihyer i ka i zenden i nyuran i been kera yô, man er iyav mbu ka a dugh, mbu nenge a iyange ga la nahan!

⁹ Er ityev yenev mbi a lu a kav ayegher a ikon ga je tsô, Una kar a mi kera sha hiar, kwagh u kô kua mtsee u usu la cii kpaa.

¹⁰ Orperapera una ember tsung, zum u una nenge iyevoron la; una ôô angahar shin awambe a mbaaferev.

¹¹ Tsô ior vea kaa er: Mimi je, injar i orperapera ngi, mimi je, Aôndo u ôron tar ijir ngu. Ngun ka sha ci u orhemen u mbawanatsam; i ver un sha ikenge i: De timin ga. Ka icam i Davidi, zum u Saulu tindi er i̱ za kura iyou sha ci u wuan un la