Upasalmi 51 - ICIGHAN BIBILO

¹ Zungwem mhôônom Aôndo, sha erdoo Wou; sha mhôônom Ou ma kôron yum la, esem akaabo am kera.

² Ôôm iferkwagh yam kera ca ca, wanger mo sha isholibo yam.

³ Gadia mo m fa akaabo am, isholibo yam ngim sha ishi gbem.

⁴ Ka We tseegh, m er U isholibo ye, m er kwagh u a lu u bo sha ishigh You; sha er Ú lu a ishô zum u U ôron kwagh, Ú lu wang zum u U lu ôron ijir la.

⁵ Shi nenge, i marem ken ifer, ka ken isholibo je, ngôm wa iyav av ye.

⁶ Nenge, ka mimi U keren ken atô u ishima ye; ka ken myer je, U nem m lu a mfe ye.

⁷ Wanger mo sha hisop, tsô me hingir wang; ôôm, tsô me kungu, á hemba senou je.

⁸ Nam m̱ ungwa msaanyol man shi m-ember; akuhe am a U sombo la, a̱ ember.

⁹ Gema ishigh sha asorabo am kera, esem aferakaa am kera cii.

¹⁰ Gba ishima i wang ken a mo, Aôndo, shi ver jijingi u he u taver ken a mo.

¹¹ De tem kera sha ishigh You ga, shi de ngohol Icighan Jijingi Wou her a mo kera ga.

¹² Hidem a iember i myom Wou her, suwem, m̱ lu a jijingi u vangertiôr.

¹³ Tsô me tese mbaerenakaabo igbenda You, mbaasorabo kpaa vea gema asema, vea hide her a We.

¹⁴ Warem sha ike i awambe, Aôndo, We, Aôndo u myom wam, nahan nombor wam ua wa icam ua wuese perapera Wou.

¹⁵ Tere, bughum ityumbuzwaagh, nahan zwa wam ua pase iwuese You.

¹⁶ Saan We ken ishima a nagh ku sôngon ga, gayô ma m ne ku; nagh ku nanden kpaa doo U ga.

¹⁷ Nagh ku Aôndo A rumun yô, ka jijingi u zamber; ishima i zamber, i uren tsung yô, Ú laha ga, Aôndo.

¹⁸ Er dedoo a Shion, sha mdoo u i doo U a na la; maa ugilgar mba Yerusalem.

¹⁹ Tsô á saan We ken ishima a nagh ku nan ku perapera, a nagh ku nanden man nagh ku nanden jimin la; tsô á na nagh ku anomabua sha atse a Ou a nanden nagh sha mi la. Ngun ka sha ci u orhemen u mbawanatsam. Ka ityesen i Davidi zum u Doegi, Oredom, va, va kaa a Saulu er: Davidi va hen ya u Ahimeleki, la