Upasalmi 5 - ICIGHAN BIBILO

Ngun ka sha ci u orhemen u mbawanatsam; mba tenge amar sha mi. Ka Pasalmi u Davidi

¹ TERE, ver ato sha akaaôron am; ver ishima sha mtoghol wam.

² Ver ato sha imo i myer wam, Tor wam man Aôndo wam; gadia ka We m sen U ye.

³ TERE, pepe Ú ungwa imo yam; pepe me ver msen wam sha ishigh You man me kegh kpaa.

⁴ Gadia We, U ngu Aôndo u ifer i dio U ga yô; kwaghbo una tema a We imôngo ga.

⁵ Mbaihaghev vea tile U sha ishi ga; mbaerenafer cii U vende ve.

⁶ Ú tim mba ve eren aie kera; or u haan awambe inya man orcugh yô, ndôhôr TER ishima.

⁷ Kpa mo yô, sha mngee u erdoo Wou, me nyôr ken iyou You; me gure me ver ishigh sha icighantempel Wou, a mciem sha ishigh You.

⁸ TERE, hemen mo a perapera Wou sha ci u mbaihomov av; sôr gbenda Wou wanger wanger sha ishigh yagh.

⁹ Gadia zwa ve ngu a kwagh u mimi ga; ken atô ve yô, ka ifer tsô; gôngor ve ka uwar u lun ivegher; nombor ve u leghem tsô.

¹⁰ Na ve ibo, Aôndo; ve̱ gbidye inya sha mbamhen vev ayol a ve; zenda ve kera sha ci u mngee u asorabo a ve; gadia ve hendan a We.

¹¹ Kpa mba ve suur sha a We cii yô, ve̱ ember; ve̱ genger amo sha iember gbem, sha ci u U cir iyol sha a ve yô; mba iti You i doo ve kpaa, ve̱ ember ken a We.

¹² Gadia U ver orperapera doo doo, TERE, U kase un a mkomshima er ka sha akuvautya nahan.