Upasalmi 45 - ICIGHAN BIBILO

¹ Ishima yam iv a kwaghôron u dedoo je, ngu haan. M ngu ôron Tor kwaghôron wam u sha inja; nombor wam ka pensel u orfan kwaghngeren dedoo.

² U hemba doon ashe a ônov mba iorov; akaaôron a doon nga dugh ken zwa Wou, ka nahan man Aôndo A ver U doo doo gbem sha won ye.

³ Har sanker Wou a̱ gba hen ikooso, We u ageegh, cir iengem You man icivir You iyol.

⁴ Zende a icivir You doo doo, sha ci u kwagh u mimi man u ishima i legh legh man u perapera; uwegh Ough ku yanegh ku̱ tese U akaa a cieryol!

⁵ Avaan a Ou hor je—ior gbidye inya sha ishigh You— nga ken ishima i mbaihomov mba tor.

⁶ Aôndo, ikônough You ki torough ki gbem sha won, tôgh ku tartor Wou ka ku perapera je,

⁷ perapera doo U ishima, kpa iferkwagh yô, vihi U ishima, ka nahan man Aôndo, Aôndo Wou, A shigh U mkurem ma iember hemba mba kwav Wou ye.

⁸ Akondo a ou cii huma mire man alue man kashia; mbaadiguve mba ken ayou a tor a sha anyinor la, mba nan we msaanyol.

⁹ Ônkasev mba torov, mba ken ashagbaukase ou; torkwase tile u ken iyan, a haa zenaria u Ofir iyol.

¹⁰ Ver ato, we wankwase, wa iko, kegh ato, ior ou ve̱ hungul we, kua ya u teru kpaa,

¹¹ ka nahan man á sar tor a dooashe wou ye, gadia un ka teru je; gure civir un kpaa.

¹² We wankwase u Tiru ne, ashagbaior va a iwua, vea ker sha u ma i doo u a ve yô.

¹³ Wan u tor u kwase doo kpekpe; ngu ken iyou na; akondo na, i tume a, i wa zenaria sha mi je;

¹⁴ á za a na hen tor a ikondo i i tum i sha hwe; anuunaukase, akar a na a a lu a na ityô la, á za a ve hen a we;

¹⁵ mba zan a ve a msaanyol man iember i tsung, ve za nyôr ken ya u tor.

¹⁶ Ônov ou vea tema sha ityough ki uter ou, ú ver ve, sha u ve̱ lu mbatarev sha won cii.

¹⁷ Me er, á zer umbur iti You sha ikov ikov; nahan akuraior aa wuese We gbem sha won. Ngun ka sha ci u orhemen u mbawanatsam. Ka Pasalmi u ônov mba Kora. Ka icam i ver sha ikenge i ukase