Upasalmi 44 - ICIGHAN BIBILO

¹ Se ungwa sha ato ase je, Aôndo, uter asev ôr se, tom u U er sha ayange a ve, sha ayange a ngise la.

² U zenda akuraior sha uwegh Ough je; ve yô, U gema U môôr ve; U er ior mbala ican; ve yô, U gema u ngee ve.

³ Gadia lu sha sanker ve ayol a ve, ve ngohol tar la ga, man lu ikasewe ve, i war ve kpaa ga, kpa lu uwegh Ough ku yanegh a ikasewe You man iwanger i ishigh You, sha ci u doo U a ve yô.

⁴ Ka We je, U lu Tor wam ye, Aôndo; kaa i̱ na Yakob mhembe.

⁵ Ka sha a We man se gbihi mbaahendanev asev inya ye; man ka sha iti You kpaa se ndyar mba ve mough num a vese ye.

⁶ Gadia m suur sha ada wam ga, sanker wam kpaa una yimam ga.

⁷ Kpa We, U yima se sha ikev i mbaahendanev asev, man shi U va, mba ve ker se ihom la, ahenge kpaa.

⁸ Ka ken Aôndo man se shi tan ihagh didi ye, sé wuese iti You gbem sha won. Sela.

⁹ Nahan kpaa, U gbihi se kera man U hee se, U kera due a ikumutya yase imôngo ga.

¹⁰ U er se, se gema ijime hen or u hendan a vese; mba ve ker se ihom kpaa, ve ya ishar sha asema a ve.

¹¹ U gema se, se hingir er iyôngo i i senge i yô; U sambe se ken akuraior.

¹² U tee ior Ou, U wa ishe ga; U ya mtsera sha ishe ve ga.

¹³ U er se, se hingir kwagh u aheenegh hen mba ve we ndor a vese, kwagh u nahan tar man kwagh u ahan hen mba ve kase se yô.

¹⁴ U er se, se hingir kwagh u veren ishor a mi hen akuraior, se hingir kwagh u jingir ityough a mi hen ior.

¹⁵ Iyange jimin cii, iheen yam ngim sha ishi, kunya u sha ishigh yagh kpaa cirim,

¹⁶ sha ci u kwaghôron u, or u heen ior shi nan toho la kpaa, man sha ci u orihom man or u oron iyev.

¹⁷ Akaa ne cii er se, nahan kpaa U hungul se ga; se nzughul sha ikuryan You kpaa ga.

¹⁸ Asema ase hide ijime ga, angahar ase kpaa kaha undu gbenda Wou ga,

¹⁹ shin er U gem U her se je se hingir ijiir i ugbaseela, man U cir se mure u kuugh iyol nahan kpaa.

²⁰ Aluer iti i Aôndo wase ia hungul se, shin sea naregh ave ase hen ma aôndo ugen yô,

²¹ Aôndo ma A dugh a kwagh ne ken igbar gaa? Gadia A fa akaamyer a ken ishima.

²² Een, sha ci Wou yô, mba shi wuan se didi, mba nengen se er se mba iyôngo i sôngon yô.

²³ Nder, Tere, ka nyi U yava? Mough sha, de te se kera gbem ga.

²⁴ Ka nyi U yer ishigh You, man ican yase i hungul We, kua mkighir u i kighir se laa?

²⁵ Gadia asema ase shiligh shin vuulevu, iyol yase var hen inya.

²⁶ Mough sha, wase se, paa se sha ci u erdoo Wou la. Ngun ka sha ci u orhemen u mbawanatsam; sha ikenge i: Ulôhô. Ka Pasalmi u ônov mba Kora. Ka ityesen. Ka icam i sha dooshima