Upasalmi 42 - ICIGHAN BIBILO

¹ Er ashim ka a ôôn fegh fegh, iwagh i i lu a mngerem i sar un nahan, kape uma wam kpaa ka a ôôn fegh fegh, U sar un la Aôndo.

² Aôndo, Aôndo u uma la, sarem er imurakôron yô; shi nan je me va, me va tile sha ishigh ki Aôndo?

³ Mliam am hingir kwaghyan wam tugh man tetan kpaa; gadia mba pinim gbem er: Aôndo wou ngu hana?

⁴ Akaa ne m umbur a, man m seer vaan shin ishima: er yan m zenden a ikpelaior imôngo, m hemen ve u zan ken iyou i Aôndo, a imo i iember man i iwuese, ka ikpelaior i eren iniongo je la.

⁵ Ishima yam, ka nyi u lu zuduu, man ka nyi u tem gir gir ken a mo ga? Ver ishima kegh Aôndo, gadia nahan kpaa shi me wuese Un, Oryiman wam man Aôndo wam kpaa.

⁶ Aôndo wam, ishima yam ngi zuduu ken a mo, ka nahan man m umbur We er m lu ken tar u Yordan man hen iwo i Hermon, kua uwo u Misar la.

⁷ Iv ngi yilan iv sha ihuran i ugugul Ou; mbamkpianger man agôndoamnger a Ou karem sha, uvem.

⁸ Nahan kpaa TER Una wa erdoo Na kwagh atetan, tugh kpaa icam Na ia lu a mo, ka msen u sônon Aôndo u uma wam je la.

⁹ Me pine Aôndo, vande wam, mer: Ka nyi m hungul We? Shi ka nyi m zenden m zungu sha ci u mkighir u mbaihomovo?

¹⁰ Bee sanker ken akuhe am, kape mbaahendanev av ve heen mo, er ve pinim gbem er: Aôndo wou ngu hana? yô.

¹¹ Ishima yam ka nyi u lu zuduu, man ka nyi u tem gir gir ken a mo ga? Ver ishima kegh Aôndo, gadia nahan kpaa shi me wuese Un, Oryiman wam man Aôndo wam kpaa.