Upasalmi 41 - ICIGHAN BIBILO

¹ Saan or u nan we mbaatsanev iko la, iyol, TER Una yima nan sha iyange i bo.

² TER Una kura nan, Una koso uma u nan, á saan nan iyol sha won kpaa; Ú na nan sha awashima u mbaihomov mba nan ga.

³ TER Una suwe nan sha gambe u nan u uange; Ú gema myavinya u nan la sha iyange i angev mbu nan.

⁴ Mo m kaa mer: TERE, zungwem mhôônom; beem angev, gadia m er U isholibo.

⁵ Mbaihomov av mba lamen sha a mo dang, kaan er: Ka hanma iyange je una kpe, iti na kpaa ia saa kera ase?

⁶ Zum u mô ve ka nana va sôrom kpaa, nan ôr aie tseegh, nan kohol angereke ken ishima i nan, zum u nana due yô, nan za ôr kwagh a mi.

⁷ Mba ve kerem ihom cii ve zua, mba kôson mo ivarivase, mba henen akaa a dang sha a mo.

⁸ Mba kaan er: Ma bouange ngu a na, er a gbe inya ne yô, una kera mough ga.

⁹ Een, kua orwam je, u m suur sha a na se ye kwagh ikagh i môm la, a tumem angahar iyol.

¹⁰ Kpa We TERE, zungwem mhôônom, shi moughom sha kpaa, sha er m̱ or ve iyev yô.

¹¹ Ka sha kwagh ne man me fa er i doo U a mo ye, er un u a kerem ihom la una kera ember er un hembem ga yô.

¹² Kpa mo yô, U suwem ken mimi wam, U veren mo sha ishigh You gbem.

¹³ I̱ wuese TER, Aôndo u Iserael, hii sha uicôronmbaashighev zan zan gbem sha won cii; Amen man shi Amen. Ngun ka sha ci u orhemen u mbawanatsam. Ka ityesen i ônov mba Kora