Upasalmi 4 - ICIGHAN BIBILO

Ngun ka sha ci u orhemen u mbawanatsam; mba koho mbaadiguve sha mi. Ka Pasalmi u Davidi

¹ Zum u me yila yô, ungwa imo yam, Aôndo u perapera wam; U verem ken ijiir i gbanger, shighe u m lu ken mzeyol yô; zungwem mhôônom, ungwa msen wam.

² Ne ônov mba iorov, shi nan je man icivir yam ia de u hingir iheene? Shi nan je man gbilinkwagh una de u doon ne ishima, man né de u keren aie ase? Sela.

³ Fa nen, TER tsegha or u i doo Un a na la sha ci Na iyol Na. TER Una ungwa zum u me yila Un yô.

⁴ Nyoon nen ishima, kpa de eren nen isholibo ga; hen nen kwagh ken asema a en sha ugambe enev; lu nen ving. Sela.

⁵ Na nen nagh ku perapera; suur nen sha TER.

⁶ Ior kpishi mba kaan er: Ka an nana tese se kwagh u doono? TERE, kende a iwanger i ishigh You sha, sha a vese.

⁷ U nam iember ken ishima i hemba i ve shighe u iyiagh vegh man wain ve ngee la.

⁸ Me yav inya, me gba mnyam a ishima i gbar gbar kpaa; gadia ka We tseegh, TERE, U ne, m lu uma ken mkpeyol ye.