Upasalmi 39 - ICIGHAN BIBILO

¹ M kaa mer, me ver ishima sha aeren a am, sha er me er isholibo sha zwa wam ga yô; me kôron zwa wam tsaha shighe u iferor a lum sha ishi yô.

² M tema a ikerkondon ving, m bugh zwa ga, shin sha u ôron kwagh u dedoo kpaa ga, kpa ican yam seer a seer,

³ i tseem ken ishima; m ngur henen yô, gba yeghen mo ken ishima. Tsô m ôr kwagh sha zwa wam:

⁴ TERE, tesem, m̱ fa mkur wam; man mngee u ayange am er a lu yô; tesem m̱ fa er m lu kwagh u karen kera yô.

⁵ Nenge, U gema ayange am hingir er igbangese i akevaveegh nahan; ayange a uma wam kpaa, sha ishigh You yô, nga er ka ma kwagh je ga yô; mimi je, hanma or sha mtil u nan, nan ngu er humbe nahan tsô. Sela.

⁶ Mimi je, hanma or nan gbe zenden er jijingi nahan tsô; mimi je, mba gbe kumbur sha, gbilin tsô; nan kohol inyaregh, kpa nan fa u nan lu yan ki ga.

⁷ Hegen yô, TERE, ka nyi m veren ashe mi? Ishimaverenkeghen yam yô, ngi her a We.

⁸ Yimam sha akaabo am cii; de gemem m̱ hingir kwagh u aheenegh hen ibumeor ga.

⁹ M huan ving, m bugh zwa ga, gadia ka We je, U er kwagh ne ye.

¹⁰ Hidem a mtsaha Wou kera, mo m gba kera sha ci u gbidiv mbu sha uwegh Ough.

¹¹ Zum u ka Wea kôôm or sha mbamtsaha sha ci u iferkwagh yô, U er mdooashe u nan a saa ishe, er ivina nahan; mimi je, hanma or ka humbe tsô. Sela.

¹² TERE, ungwa msen wam, ver ato er m yer U yô, de ongom ato sha mliam am ga, gadia m ngu orvannya hen a We, man shiror er uter av cii nahan.

¹³ Gema ashe hen a mo kera sha er i̱ saan mo iyol, man me mase karen kera, me kera lu ga ye. Ngun ka sha ci u orhemen u mbawanatsam. Ka Pasalmi u Davidi