Upasalmi 35 - ICIGHAN BIBILO

¹ TERE, zôhô a mba ve zehe a mo yô, shi nôngo num a mba ve nenge num a mo yô.

² Kôr akuvautya man perutya, mough sha, va wasem.

³ Tsuwa dagi kpaa, za yisa gbenda u mba ve tevem a ican la; kaa a uma wam Wer: Ka Mo M lu myem wou ye.

⁴ Mba ve keren mo a ku yô, ve̱ va ahenge, i̱ hee ve; man mba ve henen kwagh u bo sha a mo yô, i̱ hile a ve ijime, kunya u̱ kôr ve.

⁵ Ve̱ hingir er imough i ahumbe a purugh a min, zum u Ortyom u TER a lu zendan ve yô;

⁶ gbenda ve, u̱ wa ime, u̱ lyemen kpaa, zum u Ortyom u TER a lu zendan ve ityô yô.

⁷ Gadia lu sha ityôikaa ga, ve gba wan kper a mo tsô; shi lu sha ityôikaa kpaa ga, ve gba timen uma wam ihungwa tsô.

⁸ Mtim a̱ va a̱ bur un a bur; kper u a we la, a̱ gema, a̱ gba mi iyol na; a̱ gba mi, a̱ tim je.

⁹ Man uma wam una ember ken TER, una ember tsung ken myom Na.

¹⁰ Akuhe am cii aa kaa er: TERE, ka an nan lu er We? We u U yem icanor sha ikev i or u nan hembe un agee yô, icanor kua oribanave kpaa sha ikev i or u nan ngohol nan akaa sha apera la.

¹¹ Mbashiada mba aiev mough, mba pinen mo kwagh sha akaa a m fe ga yô,

¹² mba oron mo iyev i kwaghdedoo sha ifer; hingir mo tumbuluu ken ishima.

¹³ Kpa mo yô, zum u ve gba angev la yô, m lu a mzemba uya, m ya ican ken ishima sha kwaghyan u hôron, msen wam kpaa hidem ken vanger.

¹⁴ M er inja er ka ikarem shin ma anngôm yô, m gôvor sha mzungu er ka or u nan zungu ku u ngô u nan yô.

¹⁵ Kpa ve yô, zum u m nôngo gbev yô, ve ember ve kohol je; udangmbaiorov mba m fe ve ga kohol num sha a mo, ve tuse a mo ve de ga.

¹⁶ Er mbanahantar sha dang ken iniongo nahan, ve nyuma tsombo a mo.

¹⁷ TERE, shi nan man Ú de u kenger ving ase? Yima uma wam ken mbamtim vev, ka u a lum môm tsô la, sha ikev i agumabegha.

¹⁸ Nahan me sugh U ken mkohol u tamen, me wuese We ken atô u ior kpishi.

¹⁹ Ve mba ve lu mbaihomov av sha aie la, ve̱ de ember sha a mo ga; man shi mba ve kerem ihom sha ityôikaa ga la, ve̱ de kamen ashe sha a mo ga.

²⁰ Gadia, mba er kwagh u bem ga; mba henen akaaôron a icughugh sha mba ve tem gil gil sha tar.

²¹ Mimi je, ve aver ijô sha a mo, ve kaa er: Ahoo! Kaa ase ga! Ashe ase nenge a min ve!

²² U nenge a mi, TERE, de huan ga; TERE, de gbe ca a mo ga.

²³ Kpoghol iyol, nder sha u nan mo ishô sha kwagh wam, Aôndo wam, man Terem.

²⁴ Lu orjir wam, TERE, Aôndo wam, sha perapera Wou; ve̱ de ember sha a mo ga.

²⁵ Ve̱ de kaan ken asema a ve er: Ahoo! kape i sar se ne, ga; ve̱ de kaan er: Se mena un jimin cii ve, ga.

²⁶ Ve̱ va ahenge, kunya u̱ kôr ve, ve mba ve ember sha ican i eren mo la; kunya u̱ cir ve man iheen, ve mba ve pende kwagh a mo la.

²⁷ Ve̱ er ikenge sha iember, ve̱ lu saan saan, ve mba perapera wam a doo ve la, ve̱ zer kaan er: TER hemba cii, u i doo Un a mkpeyol u wanakiriki Na.

²⁸ Nombol wam ua shi ôron kwagh u perapera Wou man u iwuese You iyange jimin cii. Ka Pasalmi u Davidi wanakiriki u TER, sha ci u orhemen u mbawanatsam