Upasalmi 33 - ICIGHAN BIBILO

¹ Ember nen tsung ken TER, ne mbaperapera; kuma u mbaperapera ve̱ wa icam i wuese.

² Sugh nen TER sha molo, wa nen Un atsam a wuese sha adiguve u sha ingyanyinya pue.

³ Wa nen Un icam i he, kuhwa nen dedoo, i̱ kaa kpishi.

⁴ Gadia kwaghôron u TER ka u vough je; tom Na cii kpaa, i er u sha mimi.

⁵ Perapera doo Un ishima kua kwagh u mimi; tar kpaa mgbough a erdoo u TER.

⁶ Ka sha mkaanem ma TER i er Usha ye; shi ka sha iôôn i ken zwa Na i er akum a ve cii kpaa ye.

⁷ A kohol mngerem ma zegemnger, er ka tihi yô; A koso aiv a mnger ken iuna.

⁸ Tar cii, u̱ cia TER, ior mba ve lu sha won cii, ikarikase i̱ gbidye ve iyol a Na.

⁹ Gadia Wen yô, ngu A ôr kwagh, maa i lu nahan je, shi A kaa, maa i tile her dông.

¹⁰ TER bundu kwaghhenen u akuraior, ka A gema mbamhen mba iorov ve hingir gbilinkwagh.

¹¹ Mhen u TER ngu dông gbem sha won, mbamhen mba ken ishima Na kpaa mba sha ikov ikov.

¹² Saan ior mba TER A lu Aôndo ve yô, iyol, ikurior i A tsough i sha u i̱ lu dyako Na la.

¹³ TER shir ashe shin, ngu kenger ônov mba iorov cii.

¹⁴ Hen ijiir Na i teman la, A ta ashe A nenge mba ve tem shin tar cii,

¹⁵ Un u A er asema a ve cii, A we iko sha ityom ve cii kpaa.

¹⁶ Ma tor nan wer sha ikumutya i vesen ga, ortaveryol kpaa nan wer sha mvese u agee a nan ga.

¹⁷ Nyinya ngu a inja sha u zuan a mhembe ga, una war or sha agee a na a vesen kpaa ga.

¹⁸ Nenge, ashe a TER nga sha mba ve cie Un, mba ve ver ishima ve keghen erdoo Na yô,

¹⁹ sha u yiman uma ve ken ku, man u koson ve sha iyange i ijen.

²⁰ Uma wase ngu keghen TER, ka Un A lu iwasen yase man perutya wase kpaa ye.

²¹ Gadia ka ken a Na ishima yase i ember ye, ka sha icighanti Na se suur ye.

²² TERE, mhôônom Ou ma zungwen ma lu sha a vese, er se lu veren ishima keghen We yô. Ka Pasalmi u Davidi, zum u a gema mlu na sha ashe a Abimeleki u a zenda un a yem kera la