Upasalmi 32 - ICIGHAN BIBILO

¹ Saan or u i de nan kwaghbo u nan la iyol, man i cir isholibo i nan kpaa yô.

² Saan or u TER A ne nan ibo sha ifer i nan ga la, iyol; shi nan lu a icugh ken ishima i nan kpaa ga yô.

³ Er m huan ving yô, akuhe am bee iyol sha ci u mtoghor wam u m shi toghol didi yô,

⁴ gadia tugh man tetan kpaa, uwegh Ough kighir mo, mshiam am uma, hingir er ka sha mtsee u inyom yô. Sela.

⁵ M pase isholibo yam sha ishigh You, ifer yam kpaa m yer U ga, m kaa mer, me pase TER akaabo a am; tsô We U dem ibo i isholibo yam Sela.

⁶ Nahan yô, hanma or u cian Aôndo nana̱ sôn Un sha shighe u i lu pe á zua a Na yô. Mimi je, zum u uzegembamngerev vea sar avenge kpaa, vea ar her a nan ga.

⁷ Ka We, U lu ijiir yam i yeren ye, U kuram sha mzeyol, U kasem a atsam a myom. Sela.

⁸ Me pase u, shi Me tese u gbenda u ú za kpaa; Me wase u henen; ishe Yam ia lu sha a we.

⁹ De luun nen er nyinya shin alfadari, mba ve lu a kwaghfan ga nahan ga, mba i kôôm ve sha lijam man lagema, ga yô, vea mgbôghom a we ga.

¹⁰ Iferor nana ya ican sha akaa kpishi, kpa u nan suur sha TER yô, erdoo Na una wa nan atô.

¹¹ Lu nen saan saan ken TER, ember nen tsung, ne mbaperapera, genger nen imo sha iember, ne mba asema a en a lu jighilii cii yô.