Upasalmi 25 - ICIGHAN BIBILO

¹ TERE, ka sha a We m veren ishima ye.

² Aôndo wam, ka sha a We m suur ye; i̱ de vem ahenge ga; mbaihomov av kpaa ve̱ de hembem ga.

³ Een, ve cii mba ve veren ashe We yô, vea va ahenge ga; mba ve eren akaa sha icugh sha ityôikaa ga yô, ka ve je vea va ahenge ye.

⁴ TERE, nam, m̱ fa igbenda You, tesem ihange You.

⁵ Hemen mo ken mimi Wou, tesem, gadia ka We, U lu Aôndo u myem wam ye; ka We m shi veren ashe We didi ye.

⁶ TERE, umbur mhôônom Ou ma ngeen man uerdoo Ou, gadia hii tsuaa je ve lu, zan zan gbem sha won.

⁷ De umbur asorabo am a m lu iyev la ga, man atindi a m lu peren la kpaa ga; umbur mo sha erdoo Wou, sha ci u mdoom Ou, TERE.

⁸ TER ka u doon man u mimi kpaa, ka nahan man Una tese mbaasorabo gbenda ye.

⁹ Una hemen mbaasemaleghlegh sha u eren jighilii; Una tese mbaasemaleghlegh gbenda Na.

¹⁰ Igbenda i TER cii ka i sha erdoo man i sha mimi sha ci u mba ve we ikuryan Na iko kua mbampase Nav kpaa yô.

¹¹ Sha ci u iti You yô, TERE, dem iferkwagh yam, gadia i vese.

¹² Ka anti nan cie TERE? Una tese nan gbenda u nana̱ tsuwa yô.

¹³ Ka nan nana tema á kpe nan iyol ye, tsombor u nan ua ya dyako u tar.

¹⁴ Kwaghmyer u TER ngu a mba ve cie Un yô, Una tese ve ikuryan Na.

¹⁵ M veren ashe sha TER gbem, gadia Wen je, dughum angahar ken kper kera.

¹⁶ Gema her a mo, zungwem mhôônom, gadia m hingir tseneke wam, man ican kpaa i erem.

¹⁷ Atsan a ken ishima yam seer a seer; dughum ken mbamzeyol av.

¹⁸ Nenge ican yam man mtoghor wam, dem asorabo am cii.

¹⁹ Nenge mbaihomov av, gadia mba kpishi, mba kôron mo ihom i bo je.

²⁰ Kura uma wam, yimam; i̱ de vem ahenge ga, gadia ka sha a We m suur ye.

²¹ Mimi man jighjigh ve̱ kuram, gadia m ver ashe We.

²² Aôndo, yima Iserael ken akaa a tseren un la cii. Ka Pasalmi u Davidi