Upasalmi 21 - ICIGHAN BIBILO

Ka sha ci u orhemen u mbawanatsam. Ka Pasalmi u Davidi

¹ TERE, tor ngu ember agee Ou, man sha m-ember u myom Wou je yô, á kpen lun nan je!

² Isharen i ken ishima na, U na un je, msen u ken zwa na kpaa, U nyume un ga. Sela.

³ Gadia U za kegh un gbenda a iveren i sha akaadoon; u cir un idyer i tor, i zenaria u wang, sha ityo.

⁴ A sôn U uma, U na un je; ka ayange a ngeen gbem sha won je.

⁵ Iengem na vese sha myom Wou tsô; U na un icivir man shagbator.

⁶ Gadia U ver un Wer, a̱ lu a iveren i tsôron, U na un, a ember, saan un iyol sha ishigh You.

⁷ Gadia tor ngu suur sha TER; sha erdoo u Uhembansha la, á tenger a na ga.

⁸ Uwegh Ough kua tser a mbaihomov Ou cii, uwegh Ough ku yanegh kpaa kua tser a ior mba ve ker U ihom yô.

⁹ Ú gema ve, vea hingir er atse a hian nahan, shighe u Ú va ande ken igbar yô. TER Una mena ve sha iyugh Na; usu ua hia ve.

¹⁰ Ú va tim ônov vev sha won kera, tsombor ve kpaa, Ú va tim u ken ônov mba iorov kera.

¹¹ Gadia ve wa ifer ishima a We; ve hen ken ishima sha u hônon kwagh u vea fatyô u eren ga yô.

¹² Gadia Ú er ve, vea gema ijime, Ú urugh ivaan sha ishiv vev.

¹³ Kende iyol You sha, TERE, sha agee a Ou; nahan sé wa icam sé ter agee a Ou. Ka sha ci u orhemen u mbawanatsam; sha ikenge i icam i; Ashim u m-av u use. Ka Pasalmi u Davidi