Upasalmi 2 - ICIGHAN BIBILO

¹ Ka nyi man akuraior a kumbur yumu, ior kpaa ve henen ugbilinmbaakaava?

² Utor mba sha won ve mough ahendan, mbatarev kpaa ve zua sha u henen akaa a num sha TER man Un u TER A ver Un tor la, mba kaan er:

³ Sé tôndo nen ikangenev vev kera, sé kende nen ikor ve her a vese kera!

⁴ Wen u A tem Sha, ngu sen, TER ngu nahan ve tar.

⁵ Zum la Una ôr kwagh a ve sha iyugh Na, Una ta ve mciem iyol sha ishima Na i vihin tsung.

⁶ Nahan kpaa, Mo M ver Tor Wam sha icighanwo Wam, Shion.

⁷ Me pase awashima u TER: A kaa a Mo er: We, U ngu Wan Wam je, Mo M mar U nyian.

⁸ Sônom, yô, Me na U akuraior, a̱ hingir dyako Wou, man akighir a tar kpaa, a̱ hingir kwagh Wou je.

⁹ Ú her ve sha tôgh ku iyôgh; Ú hembe ve avur avur er gbande u ormaantyegh nahan.

¹⁰ Nahan yô, ne utor, lu nen a mfe, ungwa nen ityesen, ne mbaajiriv mba tarev.

¹¹ Civir nen TER a mciem, ember nen a akarkase iyol.

¹² Suse nen Wan zwa, sha er A̱ de yugh man né saa ishe sha gbenda ga yô; gadia ka Un ican u yuwen ga. Mba ve suur sha a Na cii saan ve iyol!