Upasalmi 19 - ICIGHAN BIBILO

Ngun ka sha ci u orhemen u mbawanatsam. Ka Pasalmi u Davidi

¹ Usha mba pasen icivir i Aôndo; kwavaôndo kpaa ngu tesen tom u ave Na.

² Sev mbun mbu er kwagh a sev mbugenev nduuluu, man tugh mbun mbu tesen tugh mbugenev kwaghfan.

³ Mba lamen ga, zwa kpaa mba a min ga, mba fetyô u ungwan imo ve kpaa ga,

⁴ nahan kpaa imo ve samber sha tar sha won cii, kua akaaôron a ve kpaa, zan zan ikighir i tar je. A ver iyange tenti ker;

⁵ i yô, ngi er orkwasehe u ka nan duen ken iyou i nan, i ember er ortaveryol nahan, sha u zan ayem sha hwange u i.

⁶ Mdugh u i ka ken ikighir i Sha je; mningir u i kpaa ka zan zan za ar sha ikighir na igen, ma kwagh lun myer sha mtsee u i kpaa ga.

⁷ Atindi a TER nga vough je, nga hir, nga taver uma her; mpase u TER ka u jighjigh, ka a na orlanenkwagh nan hingir orfankwagh.

⁸ Uiniezwa mba TER ka mba vough je, mba ne iember ken ishima; tindi u TER ngu wang je, ngu a wanger or ashe.

⁹ Mcie u cian Aôndo ka kwagh u wang, u lun gbem; akaaôron a jirigh a TER ka a mimi je, ka a perapera cii;

¹⁰ ka kwagh u saren, hemba zenaria, een, hemba zenaria u dedoo, u ngeen je; a nyoho je, hemba iyough, een, hemba anende a ikpayough.

¹¹ Man shi ka sha a je i we wanakiriki Wou kwagh ye; u wan a iko yô, ka zegeinjar.

¹² Mbamtsum yô, ka an nana fatyô u kaven ve? Nam ishô sha mbamtsum mba ken myer la.

¹³ Kura wanakiriki Wou sha asorabo a sha apera; a̱ de hembem agee ga, tsô me lu a acôghol a wan iyol ga, man shi me war u eren isholibo i vesen.

¹⁴ Akaaôron a ken zwa wam man mhen wam u ken ishima, ve̱ lu kwagh u kuman We ishima, TERE, Vande wam man Orpaan wam.