Upasalmi 18 - ICIGHAN BIBILO

Ngun ka sha ci u orhemen u mbawanatsam. Ka Pasalmi u Davidi, wanakiriki u TER, u a ôr TER asemberakaa a sha icam ne sha iyange i TER yima un sha ikev i mbaihomov nav cii, man sha ikev i Saulu la kpaa

¹ U doom ishima tsung je, TERE, We u U lu agee am!

² TER ka vande wam man garutya wam, man Oryiman wam kpaa, ka Aôndo wam, vande wam u taver, ka sha a Na me suur ye, ka perutya wam man korough ku myom wam, man barwoogh wam kpaa.

³ M yer TER, u A kom u á wuese Un yô; ka nahan man ka i yimam sha ikev i mbaihomov av ye.

⁴ Ikor i kuugh kamber sha a mo, iwuhamnger i mtim ta sha a mo,

⁵ ikor i Sheol kasem, akaahônon a kuugh tserem.

⁶ Ken mkighir u i kighir mo ne, m yila TER; m genger, imo, m yila Aôndo wam. A ungwa imo yam ken tempel Na, mliam am ma m vaa a Na la nyôr ken ato Na.

⁷ Tsô tar tenger, er ngigh ngigh, amagh a iwoogh kpaa tenger, i tenger a sha ci u A yugh yô.

⁸ Mnyim due Un ken ahenga, kôndo sha; usu due ken zwa Na, hia je, aka kpaa kôr usu sha u.

⁹ A nelem Usha, A hungwa shin inya; angôghime lu shin angahar a Na.

¹⁰ A unde sha cerubi, A purugh, A purugh fefa sha akper a ahumbe.

¹¹ A gema ime, hingir ijiir Na i yeren, hingir ityumbe Na i kasen Un wan atô: mngerem ma wan ime kua abeen a il.

¹² Sha iengem i sha ishigh Nagh la, abeen a Na a il gba karen, lu ura u awomboogh man akausu.

¹³ TER dura Sha, Uhembansha kende a imo Na sha— lu ura u awomboogh man akausu.

¹⁴ A ker avaan a Na, A sambe ve; inyiar Na nyiar kpishi nzughul a ve.

¹⁵ Zum la tareghnyaagh u zegemnger due, amagh a taregh hingir ken igbar, sha myange Wou TERE, sha m-ee u humbe u ken ahenga a Ou.

¹⁶ A naregh uwegh Sha, A kôrom, A dughum shin uzegembamngerev.

¹⁷ A yimam sha ikev i orihom wam u ageegh, sha ikev i mba ve kerem ihom la, gadia ve hembam agee.

¹⁸ Ve ta sha a mo sha iyange i ican yam, kpa TER lu ishuur wam;

¹⁹ A va a mo hen ijiir i gbanger, A yimam sha ci u i doo Un a mo yô.

²⁰ TER er a mo vough sha mlu wam u perapera, A nam injar sha mwanger u ave am;

²¹ gadia m wa igbenda i TER iko, m undu Aôndo wam sha u eren ifer ga.

²² Gadia akaaôron a Na a jirigh cii lum sha ishi, m hunde ishima sha akaawan a Na kpaa ga.

²³ M lu jighilii sha ishigh Nagh, m kem iyol, m nyagh iferkwagh yam.

²⁴ Ka nahan man TER A nem injar sha perapera wam, sha ave am a wanger wanger sha ishigh Nagh ye.

²⁵ Or u nan zungu mhôônom yô, U tese di nan mhôônom Ou ma zungwen je; or u mimi yô, U tese nan mimi Wou je;

²⁶ or u wang kpaa, U tese nan iyol You er U lu wang yô; kpa or u nan lu ormimi ga yô, U shi U tese nan di ishimanyoon You je.

²⁷ Gadia We U yima ior mba i kighir ve a ican yô; kpa ashe a a manger la yô, U hee a.

²⁸ Gadia We U tam imenger; TER, Aôndo wam, wanger ime yam.

²⁹ Gadia ka sha agee Ou je man m te num sha ikumutya ye; shi ka sha agee a Aôndo wam je m tsugh gilgar m aver ye.

³⁰ Gbenda u Aôndo yô, ka u jighilii je; mkaanem ma TER ma wang cii; Un ka perutya u mba ve suur sha a Na la cii.

³¹ Gadia ka an nan lu Aôndo, saa TER tseegh gaa? Man ka an nan lu vande, saa Aôndo wase tseegh gaa?

³² Ka Aôndo u A wem agee iyol la; man A gem gbenda wam u hingir vough ye.

³³ A gema angahar a am hingir er ka a ashim yô; A verem m tile sha ajiir a am a taven sha.

³⁴ Ngu tesen ave am ityav mbi nôngon; zan zan je akaseaveegh am nga hende ada u iyôgh ki bashigh.

³⁵ U nam perutya u myom Wou kpaa, uwegh Ough ku yanegh ku kôrom sha; ishima You i legh legh erem m gba ikôr.

³⁶ U naregh a-avenangahar a am gba ca; angahar a am kpaa, a dolough ga.

³⁷ M zenda mbaihomov av, m za kohol ve, m hide ga, saa m vande timin ve.

³⁸ M her ve je, ve kera fatyô u moughon ga, ve gbidye inya hen angahar a am.

³⁹ Gadia U wam agee iyol sha u zan ityav, mba ve mough num a mo, U er ve ve shiligh hen ikum yam.

⁴⁰ Man shi U na mbaihomov av yevese mo; mba ve kerem ihom yô, m tim ve kera.

⁴¹ Ve er ikenge, kpa or u yiman ve lu ga; ve yila TER, kpa A rumun ga.

⁴² Tsô m kume ve, ve hingir er vuulevu u ahumbe a purugh a min yô; m haa ve kera er angbiôr a sha igbenda yô.

⁴³ U yimam sha inyum i ior; U gemam m hingir orhemen u akuraior; ior mba m fe ve ga kpaa, ve hingir mbashilen mo.

⁴⁴ Er ve ungwa a ungwa gwa wam tseegh tsô, ve rumun imo yam je; atôatyev va hen a mo agurenu.

⁴⁵ Atôatyev use, a due ken ajiir a a, a ken iuv la, a akarkase iyol.

⁴⁶ TER ngu uma; i̱ wuese Vande wam; i̱ kende Aôndo u myom wam ne sha;

⁴⁷ ka Aôndo u A oron iyev sha ci wam, u A ne akuraior sha ikev yam;

⁴⁸ A yimam sha ikev i mbaihomov av; een, U kendem sha hen mba ve hendan a mo, U yimam sha ikev i ipilaor.

⁴⁹ Ka nahan man me wuese We ken akuraior, TERE; me wa atsam a wuese iti You kpaa ye.

⁵⁰ Ngu nan tor Na myom u vesen; ngu tesen erdoo a u A shigh un mkurem la, a Davidi kua tsombor na gbem.