Upasalmi 146 - ICIGHAN BIBILO

¹ Haleluya. Wuese TER, we uma wam.

² Me wuese TER, sha ayange a m lu uma ne, me wa atsam me wuese Aôndo wam, sha ayange a m hile lu her ne.

³ De suur nen sha mbatarev, sha wan u or u iwasen i lu her a na ga la ze;

⁴ zum u iôôn i nan ka ia due yô, nan shi nan hide hen inya i nan, sha iyange la je mbamhen mba nan saa ishe.

⁵ Saan or u Aôndo u Yakob A lu iwasen i nan la, iyol, u ishimaverenkeghen i nan kpaa, i lu sha TER, Aôndo u nan yô,

⁶ u A gbe Sha man tar, kua zegemnger man akaa a a lu shimi cii kpaa yô, u A lu jighjigh gbem sha won,

⁷ u A er ijir i mimi sha ci u mba i kighir ve a ican yô; u A ne mbagenev kwaghyan. TER pasen mbakwarev, toho,

⁸ TER bughun ashe a mbaapirashe, TER kenden a mba ve lu ngugh ngugh la sha, mbaperapera doo TER ishima.

⁹ TER kor ushirmbaiorov, wese ancôgholov man kasev mba côgholov, kpa nzughul a gbenda u mbaaferev.

¹⁰ TER Una tema tor gbem sha won. Shion, Aôndo wou ngu sha ikov ikov je. Haleluya.