Upasalmi 145 - ICIGHAN BIBILO

¹ Me civir We, Tor, Aôndo wam me wuese iti You gbem sha won.

² Hanma iyange me wuese we, me wuese iti You gbem sha won,

³ TER hemba cii, A kuma iwuese kpishi je, icivir Na kpaa gande u kaven.

⁴ Kov ugen ua wuese ityom You a kov ugen, ua pase aeren a Ou a ageegh.

⁵ Me pase kwagh u iengem i icivir You i hemban la, man shi aeren a Ou a kpilighyol.

⁶ Ior vea ôr kwagh u aeren a Ou a ageegh a a cier iyol la, mo kpaa me pase mhembe Wou er U hembe cii yô.

⁷ Vea ôr nduuluu vea umbur mdoom Ou ma vesen, vea wa icam genger genger vea ter perapera Wou kpaa.

⁸ TER mgbough a mrumun u sha mhôôn man mhôônom ma zungwen kpaa, ishima vihin Un fefa ga, erdoo Na ngee wuee.

⁹ TER eren dedoo a ior cii; mhôônom ma ker Un a ityom Na cii.

¹⁰ Ityom You cii ia wuese We, TERE; mba i doo U a ve la, vea wuese We;

¹¹ vea ôr kwagh u iengem i tartor Wou, vea ter agee a Ou kpaa;

¹² sha er á pase ônov mba iorov aeren a Na a ageegh, kua iengem i icivir i tartor Na la kpaa.

¹³ Tartor Wou ka icôrontartor je, Ú tema tor Wou sha ikov ikov cii.

¹⁴ TER ka A kôr mba ve gbe la cii, kenden a mba ve lu ngugh ngugh la sha.

¹⁵ Ashe a uuma cii nga sha a We, U ne ve kwaghyan sha ashighe ashighe.

¹⁶ U bugh uwegh Ough, U ne hanma kwagh u uma sha isharen na, ka kom un.

¹⁷ TER eren perapera sha igbenda Na cii, man shi eren dedoo ken ityom Na cii kpaa.

¹⁸ TER ngu ikua ikua a mba ve yer Un cii, mba ve yer Un sha mimi la cii.

¹⁹ Una na mba ve cie Un la kwagh u a sar ve yô, man shi Una ungwa mliam vem, Una yima ve kpaa.

²⁰ TER kor mba A doo ve ishima la cii, kpa mbaaferev yô, Una tim ve kera.

²¹ Zwa wam ua ôron kwagh u iwuese i TER; uuma cii ve̱ wuese icighanti Na gbem sha won.