Upasalmi 141 - ICIGHAN BIBILO

¹ TERE, m yila U, va her a mo fefa; ver ato sha imo yam, zum u me yila U yô.

² Msen wam a̱ lu U sha ishi er nagh ku humandoon nahan, man shi mkende u ave am sha kpaa, er nagh ku nan ku aikighe yô.

³ Ver mkor sha zwa wam TERE, kura ityumbuzwaagh yam.

⁴ De kera goom a ishima yam er ia za ken kwagh u bo ga, er me hingir u eren aferakaa a ior mba ve eren ifer la imôngo, ga yô; de rumun Wer, m̱ ya akaanyohon a ve la kpaa ga.

⁵ De orperapera nana̱ gbidyem, á lum kwagh u dedoo, nana̱ zôhô a mo kpaa, á lum er ka mkurem ma sha ityou nahan, ityough yagh kia venda ma ga; kpa me eren msen her, shin er ve eren afer nahan kpaa;

⁶ zum u á haa mbaajiriv vev shin bo sha kpe u vandegh yô, vea ungwa akaaôron am er a doo yô.

⁷ Er ka i pav iwen hen inya avur avur nahan, kape á tsenda akuhe a ase sha zwa u Sheol la.

⁸ Gadia ashe a am nga sha a We, AÔNDO Tere; ka sha a We m suur ye, de hee uma wam kera ga.

⁹ Kuram sha ihônon i i henem yô, sha akaahônon a mba ve eren afer la.

¹⁰ Mbaaferev ve̱ gba ken ukper vev ayol a ve, mo m̱ gema m̱ war. Ka ityesen i Davidi, zum u a lu ken barwo. Ka msen