Upasalmi 139 - ICIGHAN BIBILO

¹ TERE, U tôvom, U fam.

² Mtem wam man mmough wam kpaa We U fa, U fa mhen wam ken ica je.

³ U tôv zende wam man myav wam, U fa igbenda yam cii.

⁴ Gadia er kwaghôron a lu a duem ken zwa ga je tsô, We TER U fa cii.

⁵ U yisam ken ijime kua ken ishi kpaa, shi U penda uwegh Ough sha a mo.

⁶ Imbakwaghfan ne kpiligh mo iyol je zua ga, i tav sha yum, m fatyô u aren sha min ga.

⁷ Ka han je me za me undu Jijingi Wouwe? Shi kan han je me yevese ishigh You, me zaa?

⁸ Aluer mea kôndo mea yem Sha je kpaa, U ngu shami, man aluer mea tar gambe shin Sheol kpaa, nenge, U ngu shimi;

⁹ aluer mea ngohol akper a m-avuse je, mea za tema ken akighir a zegemnger kpaa,

¹⁰ keela je kpaa uwegh Ough kua hemen mo, uwegh Ough ku yanegh kua kôrom.

¹¹ Aluer mea kaa mer: Angôghime a̱ wam, iwanger i i kasem kpaa, i̱ hingir tugh,

¹² yô, ime je kpaa, ngi yeren We kwagh ga, tugh ka mbu wanger er atetan nahan, ime man iwanger ka U kwagh môm tsô.

¹³ Gadia ka We U er ahi a am, ka We U maghem ken iyav mbu ngôm ye.

¹⁴ M ngu wuese We er U erem m lu kwagh u cieryol man u kpilighyol kpaa yô; ityom You kpiligh iyol, uma wam kpaa fa nahan dedoo!

¹⁵ A kuhe am lu U myer ga, zum u i erem ken myer, sha uee shin ajiir a zan a shin tar la.

¹⁶ Ashe a Ou nenge ijenawambe yam, man i nger a ken ruamabera Wou cii, ka ayange a i vande veren mo a je la, zum u iyange i môm i môm lu a lu ga yô.

¹⁷ Aôndo, mbamhen Ou doom je! iyenge ve kpaa ngee gande.

¹⁸ Aluer mea er iyenge ve kpaa, ma ve hembe waarawa. Er m nder yô, m shi m ngu a We imôngo heregh.

¹⁹ Ma U woo mbaaferev kera, Aôndo —ne ior mbahaan awambe inya, karem nen kera—

²⁰ ve mba ve hendan a We sha ifer, ve teren iti You sha aie la.

²¹ Me kera kôr mba ve ker U ihom la ihom ga ha, TERE? Shi ishima ia ndôhôr mo a mba ve mough num a We la ga ha?

²² M kôr ve ihom sha boihom je; ve hingir mbaihomov av.

²³ Tôv kwagh wam, Aôndo, fa ishima yam, karem, fa mbamhen av,

²⁴ nenge, shin ma gbenda u ifer a lu ken a mo yô? Hemen mo sha gbenda u tsôron. Ngun ka sha ci u orhemen u mbawanatsam. Ka Pasalmi u Davidi