Upasalmi 119 - ICIGHAN BIBILO

¹ Mba i saan ve iyol yô, ka mba gbenda ve u lu vough, ve zenden sha tindi u TER la.

² Mba i saan ve iyol yô, ka mba ve we mbampase Nav iko, ve keren Un a ishima ve cii la;

³ shi ve eren ma ifer ga, kpa ve zenden sha igbenda Na.

⁴ We, U na uiniezwa Ou, sha er á waan ve iko a ishima i môm yô.

⁵ Aeren a am ma a lu ase taveraa, sha u eren sha akaawan a Ou vough.

⁶ Nahan ma m ve ahenge ga, er m veren ishima sha atindi a Ou ne cii yô.

⁷ Me wuese We a ishima i jighilii, zum u me henen akaaôron a Ou a jirigh a perapera la yô.

⁸ Me kura akaawan a Ou; de undun mo purututu ga.

⁹ Ka sha nyi man wanyekwaor una wanger gbenda na? Ka sha u wan mkaanem Ou iko.

¹⁰ M ker U a ishima yam cii, de deen mo, m̱ undu atindi a Ou ga.

¹¹ M kusu mkaanem Ou ken ishima yam, sha er me er U isholibo ga yô.

¹² We U kuma iwuese, TERE, tesem, akaawan a Ou.

¹³ Ka sha zwa wam je, m pase akaaôron a jirigh a sha zwa Wou la cii ye.

¹⁴ M ember sha gbenda u mbampase Ou tsung je, bee er ka sha inyaregh ki ngeen nahan.

¹⁵ Me zer henen sha uiniezwa Ou, me ver ishima sha igbenda You kpaa.

¹⁶ Doom ken ishima u wan akaawan a Ou iko, mkaanem Ou maa hungul mo mayange ga.

¹⁷ Er dedoo a wanakiriki Wou, m̱ lu uma, nahan me wa mkaanem Ou iko.

¹⁸ Bughum ashe, m̱ nenge akaakpilighyol a ken atindiakaa a Ou la.

¹⁹ M ngu shiror shin tar; de yeren mo atindi a Ou ga.

²⁰ Sar uma wam tsung a akaaôron a Ou a jirigh hanma shighe je.

²¹ U zehe a mba ve gengese ayol mba i we ve ifan, mba ve undu atindi a Ou la.

²² Hilem a iheen man ilyahan kera, gadia m kor mbampase Ou.

²³ Shin er mbatarev vea tema vea zuan zwa sha a mo kpaa, wanakiriki Wou una zeren henen sha akaawan a Ou.

²⁴ Mbampase Ou kpaa ka iember yam je, shi ka ve kpaa ve hingir mbawasen mo mhen ye.

²⁵ Uma wam var hen vuulevu, taver uma wam sha mkaanem Ou.

²⁶ M pase igbenda yam, We kpaa, ungwa imo yam; tesem akaawan a Ou.

²⁷ Nam m̱ kav gbenda u uiniezwa Ou, sha er m̱ hen kwagh u aeren a Ou a kpilighyol la.

²⁸ Ishima yinam sha ci u zayol, taver mo sha mkaanem Ou.

²⁹ Hilem a gbenda u aiegh kera, man shi sha mrumun u sha mhôôn Wou la, nam atindiakaa a Ou.

³⁰ M tsôr gbenda u mimi, m ver akaaôron a Ou a jirigh sha ishigh yagh.

³¹ M var a mbampase Ou, TERE, de nem kunya ga.

³² Me za ayem sha gbenda u atindi a Ou, gadia U er ishima yam, ngi gbar gbar.

³³ TERE, tesem gbenda u akaawan a Ou, nahan me kuran a zan zan sha mkur je.

³⁴ Nam mkav, m̱ kuran atindiakaa a Ou, m̱ waan a iko a ishima yam cii.

³⁵ Erem m̱ zenden sha gbenda u atindi a Ou, gadia ka u u doom ye.

³⁶ Goom a ishima yam ken mbampase Ou, i̱ de luun sha mtsera u bo ga.

³⁷ Gemam ashe kera sha u kenger gbilinkwagh, man taver uma wam u zan sha igbenda You.

³⁸ Kule ityendezwa You a wanakiriki Wou, i i kom mba ve cie U la.

³⁹ Gema iheen yam, i m cie i la, kera, gadia akaaôron a Ou a jirigh la doo.

⁴⁰ Nenge, uiniezwa Ou sarem tsung, taver uma wam u zan sha perapera Wou.

⁴¹ Uerdoo Ou ma ve ve her a mo TERE, ka myom Wou u sha ityendezwa You je la,

⁴² sha er me lu a kwagh u me ôr a u a heen mo la yô, gadia m suur sha mkaanem Ou.

⁴³ De ngohol mo kwaghôron u mimi ken zwa kera ca ca ga, gadia m taver ishima sha akaaôron a Ou a jirigh,

⁴⁴ ka nahan man me waan atindiakaa a Ou iko gbem sha won ye.

⁴⁵ Man shi me zende gbar gbar kpaa, gadia m ker uiniezwa Ou.

⁴⁶ Me ôr kwagh u mbampase Ou sha ishigh ki utor kpaa, kunya ua kôrom ga.

⁴⁷ Saan mo iyol a atindi a Ou, a a doom ishima la.

⁴⁸ Me kende ave am sha kpaa, sha atindi a Ou a a doom ishima la, gadia U erem m ngu a ishimaverenkeghen.

⁴⁹ Umbur mkaanem Ou ma U er a wanakiriki Wou la, gadia U erem m ngu a ishimaverenkeghen.

⁵⁰ Ka ishimasurun yam i ken ican yam ne, er mkaanem Ou ma taver uma wam yô.

⁵¹ Mbagengeseyol lu sen mo ibumegh, nahan kpaa, m pav a atindiakaa a Ou ga.

⁵² M umbur akaaôron a Ou a jirigh a ngise la, TERE, nahan ishima pever mo.

⁵³ Ishima vihim tsung, sha ci u mbaaferev mba ve undu atindiakaa a Ou la.

⁵⁴ Akaawan a Ou hingir mo atsam a wan, hen ya u m lu shiror her la.

⁵⁵ M umbur iti You tugh, TERE, shi m kor atindiakaa a Ou kpaa.

⁵⁶ Ka kwagh wam je ne, sha ci u m kor uiniezwa Ou yô.

⁵⁷ TER ka kwar wam, m tôndo zwa mer, me kuran akaaôron a Ou.

⁵⁸ M zamber We a ishima i môm mer, ma i doo U a mo, zungwem mhôônom sha ityendezwa You la.

⁵⁹ M hen sha igbenda yam, m gema angahar a am u zan sha mbampase Ou.

⁶⁰ M er fefa, m ngôôr ga, sha u kuran atindi a Ou.

⁶¹ Ikor i mbaaferev kpelegh sha a mo, kpa atindiakaa a Ou hungul mo ga.

⁶² Ka m mough ateghôtôutu m wuese We, sha ci u akaaôron a jirigh a Ou a mimi la.

⁶³ Mo m ngu ijende i mba ve cie U cii, kua mba ve kor uiniezwa Ou yô.

⁶⁴ Tar iv a erdoo Wou, TERE, Tesem akaawan a Ou.

⁶⁵ U er a wanakiriki Wou dedoo TERE, sha mkaanem Ou.

⁶⁶ Tesem mkav u dedoo man kwaghfan, gadia m na atindi a Ou jighjigh.

⁶⁷ Zum u ican i lu a erem ga la, m tsume, kpa hegen yô, m ngu wan mkaanem Ou iko.

⁶⁸ U doo, man U eren akaadoon kpaa, tesem akaawan a Ou.

⁶⁹ Mbagengeseyol wam aie iyol, kpa mo yô, m kor uiniezwa Ou a ishima yam cii.

⁷⁰ Ishima ve ngi juhuluu, er ahôm yô, kpa mo yô, m ember sha atindiakaa a Ou.

⁷¹ Doom er ican i erem, sha er m̱ hen akaawan a Ou yô.

⁷² Atindiakaa a sha zwa Wou hembam agbenger a zenaria man a azurfa udubu je.

⁷³ Ka ave Ou a erem man a maghem kpaa ye; nam mkav, m̱ hen atindi a Ou.

⁷⁴ Mba ve cie U vea nenge a mo, yô, vea ember, sha er ishimaverenkeghen yam i lu sha mkaanem Ou yô.

⁷⁵ M fa, TERE, akaaôron a Ou a jirigh ka a perapera je, man er i lu sha jighjigh Wou man U erem ican je ye.

⁷⁶ Erdoo Wou a̱ shi hingir kwagh u surun mo ishima, sha ityendezwa You i U tôndo a wanakiriki Wou la.

⁷⁷ Mhôônom ma kôron Ou ma ar her a mo, er me lu uma yô, gadia atindiakaa a Ou ka a, a lu iember yam ye.

⁷⁸ Kunya u̱ kôr mbagengeseyol, gadia ve nzughul a mo sha aie, kpa mo yô, me hen kwagh u uiniezwa Ou ken ishima.

⁷⁹ Mbacian We ve̱ gema ve̱ va her a mo, sha er ve̱ fa mbampase Ou yô.

⁸⁰ Ishima yam i̱ lu vough ken akaawan a Ou, sha er kunya u̱ de kerem ga yô.

⁸¹ Isharen ngim ken ishima sha myom Wou tsung je, m ngu veren ishima keghen mkaanem Ou.

⁸² Ashe ngam sha mkaanem Ou tsung; m kaa mer, shi nan je man Ú shi surum ishima ase?

⁸³ Gadia m hingir er ka ikpa i sha mnyi nahan, nahan kpaa akaawan a Ou hungul mo ga.

⁸⁴ Ayange a wanakiriki Wou sha won a shi nana? Shi nan je man Ú ôr ijir a mba ve tevem a icana?

⁸⁵ Mbagengeseyol time ahungwa sha ci wam, ka mba ve we atindiakaa a Ou iko ga je la.

⁸⁶ Atindi a Ou cii ka a mimi; ve tôvom a ican a ityôikaa shio, shi wasema!

⁸⁷ Shi kpuaa tsô, ma ve timin shin tar kera, kpa mo yô, m ta uiniezwa Ou kera ga.

⁸⁸ Taver uma wam sha erdoo Wou, sha er me kura mpase u sha zwa Wou yô.

⁸⁹ Mkaanem Ou TERE, ma dông ken Usha gbem sha won.

⁹⁰ Jighjigh Wou ngu sha ikov ikov; U ver tar dông, ngu her;

⁹¹ ka sha akaawan a Ou ve lu her zan zan nyian ye, gadia akaa cii nga eren We tom.

⁹² Ka er atindiakaa a Ou a doom ishima tsung yô, gayô, ma m tim ken ican yam ne.

⁹³ Uiniezwa Ou vea hungul mo mayange ga, gadia ka sha a ve U taver uma wam ye.

⁹⁴ Mo m ngu u Wou, warem, gadia m ker uiniezwa Ou.

⁹⁵ Mbaaferev kegh er vea timim, kpa me wa mbampase Ou iko.

⁹⁶ M nenge ikighir i hanma kwagh u vough cii, kpa tindi Wou yô, gbangese kpishi.

⁹⁷ Atindiakaa a Ou, doom ishima zee! Kam kwagh u shin henen sha mi didi.

⁹⁸ Atindi a Ou nam m hemba mbaihomov av kwaghfan, gadia a nga a mo gbem je.

⁹⁹ M hemba kaven kwagh a mbatesen av cii, gadia mbampase Ou mbam kwagh u henen sha mi.

¹⁰⁰ M hemba kaven kwagh a mbabeenyol, sha ci u m kor uiniezwa Ou yô.

¹⁰¹ M kôvor angahar a am kera sha hanma gbenda u ifer, sha er me kura mkaanem Ou yô.

¹⁰² M kaha m undu akaaôron a Ou a jirigh ga, gadia ka We, U tesem ye.

¹⁰³ Mkaanem Ou zam zwa zee! Een, a hembam zam zwa a iyough i ken toho kpaa.

¹⁰⁴ Ka sha uiniezwa Ou m zough a mkav ye, ka nahan man m ker hanma gbenda u aiegh ihom ye.

¹⁰⁵ Mkaanem Ou ka imenger i angahar a am, man iwanger i gbenda wam kpaa.

¹⁰⁶ M bum, shi me kure un kpaa, me kuran akaaôron a jirigh a Ou a perapera.

¹⁰⁷ Ican erem tsung je doo ga; taver uma wam TERE, sha mkaanem Ou.

¹⁰⁸ TERE, ma U ngohol nagh ku sha ishima i dedoo ku sha zwa wam ne, shi tesem akaaôron a Ou a jirigh kpaa.

¹⁰⁹ M kusun uma wam ken uwegh agh gbem, nahan kpaa atindiakaa a Ou hungul mo ga.

¹¹⁰ Mbaaferev hônom, nahan kpaa m kaha m undu uiniezwa Ou ga.

¹¹¹ M ngohol mbampase Ou mer ve̱ lu dyako wam gbem, gadia ka ve, ve lu iember i ishima yam ye.

¹¹² M ver ishima sha u eren akaawan a Ou gbem zan zan mkur je.

¹¹³ M ker mbaasemaahar ihom, kpa atindiakaa a Ou yô, doom ishima.

¹¹⁴ We U ngu ijiir yam i yeren, man perutya wam kpaa, m ngu veren ishima keghen mkaanem Ou.

¹¹⁵ Kar nen hen a mo sha, ne mbaerenafer, sha er m̱ kuran atindi a Aôndo wam yô!

¹¹⁶ Tuur mo sha mkaanem Ou, m̱ lu uma, m̱ de ve ahenge sha ishima yam i verenkeghen la ga.

¹¹⁷ Suwem, man me war ye, nahan me waan akaawan a Ou iko gbem.

¹¹⁸ U venda mba ve tsum ve undu akaawan a Ou cii, gadia ayom a ve la ka aie.

¹¹⁹ U kough mbaaferev shin tar kera ca ca, er ka hugh nahan, ka nahan man mbampase Ou ve doom ishima ye.

¹²⁰ Ikarikase gbidyem iyol sha mciem ma m cie U la, m ngu cian ajiraôron a Ou kpaa.

¹²¹ M er kwagh u a lu vough, man u perapera kpaa, de undun mo sha ikev i mba ve kighir mo a ican la ga.

¹²² Lu ishuur u wanakiriki Wou er á kpe un iyol yô; mbagengeseyol ve̱ de kighir mo a ican ga.

¹²³ Ashe ngam sha myom Wou tsung je, kua mkaanem Ou ma perapera la.

¹²⁴ Er a wanakiriki Wou sha erdoo Wou la, man tesem akaawan a Ou kpaa.

¹²⁵ Mo m ngu wanakiriki Wou, nam mkav, m̱ fa mbampase Ou.

¹²⁶ Kuma pe TER Una er kwagh ve, gadia i vihi atindiakaa a Ou.

¹²⁷ Kape i lu man atindi a Ou a doom, a hembem zenaria la, een, hemba zenaria u dedoo kpaa.

¹²⁸ Ka nahan man me ver angahar a am jighilii sha uiniezwa Ou cii ye, shi m ker hanma gbenda u aiegh ihom.

¹²⁹ Mbampase Ou ka kwagh u kpilighyol, ka nahan man uma wam a kor ve ye.

¹³⁰ Mbugh u akaaôron a Ou ne iwanger, man shi ne mba ve lan kwagh mkav kpaa.

¹³¹ M aver zwa gbangese, m ôô tsuree, gadia atindi a Ou gbam ishima.

¹³² Gema ishigh ken a mo, zungwem mhôônom, er ka U er a mba iti You i doo ve ishima la nahan.

¹³³ Ver angahar a am a̱ lu taveraa sha mkaanem Ou, ma injaifer i môm i̱ de ye tor sha a mo ga.

¹³⁴ Paam sha mkighir u sha ican i or la, nahan me wa uiniezwa Ou iko.

¹³⁵ Er ishigh You ki̱ wanger sha wanakiriki Wou, shi tesem akaawan a Ou kpaa.

¹³⁶ Ashe am nga haan mliam er uikuwanmbamngerev mba senen yô, sha ci u ve we atindiakaa a Ou iko ga yô.

¹³⁷ TERE, We U ngu u perapera, ajir a Ou a ôron kpaa ka a sha mimi.

¹³⁸ U ver mbampase Ou sha perapera man sha mimi tseegh.

¹³⁹ Gbashima wam wuam, sha ci u mbaahendanev av hungul akaaôron a Ou yô.

¹⁴⁰ Mkaanem Ou ma wang je, ma doo wanakiriki Wou ishima je.

¹⁴¹ M ngu kpeghee man i laham kpaa, nahan kpaa uiniezwa Ou hungul mo ga.

¹⁴² Perapera Wou ka perapera u tsôron gbem sha won je, atindiakaa a Ou kpaa ka a mimi.

¹⁴³ Zayol kua ican i tsung tserem, kpa atindi a Ou doom ishima tsung.

¹⁴⁴ Mbampase Ou ka mba perapera gbem sha won je; nam mkav, m̱ lu uma.

¹⁴⁵ M yila a ishima yam cii, ungwam TERE! Me kuran akaawan a Ou la.

¹⁴⁶ M yila U; yimam m̱ waan mbampase Ou iko.

¹⁴⁷ Er sev lu a wanger ga tsô, m yila; m ngu veren ishima keghen mkaanem Ou.

¹⁴⁸ Ashe am vande a mbamkor mba utugh, sha u henen sha kwagh u mkaanem Ou.

¹⁴⁹ Ungwa imo yam sha erdoo Wou, taver uma wam sha akaaôron a Ou a jirigh, TERE.

¹⁵⁰ Mba ve ze sha ifer yô, mba van ikua ikua, mba ca a atindiakaa a Ou.

¹⁵¹ U ngu ikua, TERE, atindi a Ou cii kpaa, ka a mimi je.

¹⁵² M fa ngise je sha kwagh u mbampase Ou, er U ver ve sha er ve̱ lu gbem yô.

¹⁵³ Nenge ican yam, yimam, gadia atindiakaa a Ou hungul mo ga.

¹⁵⁴ Ta ken a mo, ôr kwagh wam, paam, taver uma wam sha mkaanem Ou.

¹⁵⁵ Myem ngu ca a mbaaferev, gadia mba keren akaawan a Ou ga.

¹⁵⁶ Mhôônom Ou ma kôron ngee tsô, TERE; taver uma wam sha akaaôron a Ou a jirigh.

¹⁵⁷ Mbatôvon mo a ican man mbaahendanev av ve ngee tsô, nahan kpaa m undu mbampase Ou ga.

¹⁵⁸ M nenge mbaeren kwagh sha icugh la, yô, ishima ndôhôr mo; sha ci u ve we mkaanem Ou iko ga yô.

¹⁵⁹ Nenge er uiniezwa Ou ve doom ishima yô; taver uma wam sha erdoo Wou, TERE.

¹⁶⁰ Mkaanem Ou jimin cii ka kwagh u mimi je, akaaôron a Ou a jirigh a perapera ci ca cii, ka a tsôron sha won je.

¹⁶¹ Mbatarev gba tôvon mo a ican tsô, ityôikaa lu ga, kpa m cie kwaghôron Wou ken ishima.

¹⁶² M ember tsung sha mkaanem Ou, vough er ka or u nan ye ishar kpishi yô.

¹⁶³ Icugh vihim ishima, i ndôhôr mo ishima kpaa, kpa atindiakaa a Ou gema doom ishima.

¹⁶⁴ Ka m wuese We kwa taankaruhar sha iyange i môm, sha ci u akaaôron Ou a jirigh a perapera la.

¹⁶⁵ Mba atindiakaa a Ou a doo ve ishima yô, mba a bem kpishi je, ma kwagh u nan ve gbev mbu nôngon kera ngu ga.

¹⁶⁶ M ngu veren ishima keghen myom Wou, TERE, shi m er sha atindi a Ou kpaa.

¹⁶⁷ Uma wam kor mbampase Ou, ve doom ishima tsung je!

¹⁶⁸ M kor uiniezwa Ou man mbampase Ou, gadia igbenda yam cii, ngi sha ishigh You.

¹⁶⁹ Mliam am ma mgbôghom sha ishigh You TERE, nam mkav sha mkaanem ou.

¹⁷⁰ Zamber wam ma a mgbôghom sha ishigh You, warem sha mkaanem Ou.

¹⁷¹ Zwa wam ua wuese nduuluu, gadia U tesen mo akaawan a Ou.

¹⁷² Nombor wam ua wa icam ua ter mkaanem Ou, gadia atindi a Ou cii ka a perapera.

¹⁷³ Uwegh Ough ku̱ lu iwasen yam, gadia m tsôr uiniezwa Ou.

¹⁷⁴ M ngu veren ashe sha myom Wou TERE, atindiakaa a Ou kpaa nga iember yam je.

¹⁷⁵ Uma wam a̱ lu uma, a̱ wuese We; akaaôron a Ou a jirigh kpaa, a̱ wasem.

¹⁷⁶ M tsume er iyôngo i i saa yô, ker wanakiriki Wou, gadia atindi a Ou hungul mo ga.