Upasalmi 11 - ICIGHAN BIBILO

Ngun ka sha ci u orhemen u mbawanatsam. Ka Pasalmi u Davidi

¹ Ka sha TER m suur ye; man ka nyi ne kaan a uma wam ner: Yevese yem sha uwo wou er ka inyon nahana?

² Gadia nenge, mbaaferev henda ada, ve wa ivaan ve sha da, sha er vea ker or u lun a mimi ken ishima, ken ime.

³ Aluer amagh aa yôhôl yô, orperapera nana er nana?

⁴ TER ngu ken icighantempel Na; ikônough ki torough ki TER ki Sha; ashe Na nga kenger, akurashee a Na nga karen ônov mba iorov.

⁵ TER ngu karen orperapera kua iferor kpaa; or u ipila i doo nan la yô, A kôr nan ihom.

⁶ Una haa akausu a kpenger kpenger sha mbaaferev kua sulfur kpaa; ahumbe a hian, ka kwar u iyongo ve.

⁷ Gadia TER ka u perapera je, perapera doo Un ishima; mbamimi yô, vea nenge ishigh Nagh.