Upasalmi 109 - ICIGHAN BIBILO

¹ De huan ga, Aôndo u iwuese Yam,

² gadia ka zwa u iferor, ka zwa u icughugh ve bugh sha a mo ye; ve ôr kwagh a mo sha nombor u aiegh.

³ Ve toor a mo cam ce cam sha akaaôron a sha ihom, ve gba nôngon num a mo sha ityôikaa ga.

⁴ Sha dooshima wam la, ve gema ve hingir mbaahendanev av, kpa mo yô, m lu eren msen.

⁵ Ve orom iyev i kwaghdedoo sha ifer, man dooshima wam kpaa sha ihom.

⁶ Wa un sha ikev i iferor, ormsende a̱ tile un ken uwegh ku yanegh.

⁷ Zum u á ôron un ijir yô, a̱ due a ibo iyol, msen na kpaa a̱ gema a̱ hingir isholibo.

⁸ Ayange a na a̱ ndahar, orgen nana̱ ngohol tom na.

⁹ Ônov nav kpaa, icôghol i ter i̱ kôr ve, kwase na kpaa, a̱ hingir kwasecôghol.

¹⁰ Ônov nav ve̱ hingir mbazenden wue wue, sônon kwagh, i̱ num ve hen ice ve kera.

¹¹ Or u yaren injô nana̱ kura un ikav cii; atôatyev a̱ ya ishar sha tom na cii.

¹² A̱ de lu a or u zungwen un mhôônom ga; or môm tsô kpaa, nana̱ de zungu ancôgholov nav mhôônom ga.

¹³ Tsombor na, u̱ tim, iti ve i̱ hungul ken kov u ua va mough la kera.

¹⁴ Ifer i uter nav i̱ lu kwagh u á umbur sha ishigh ki TER; i̱ de koughon isholibo i ngô na kera ga,

¹⁵ i̱ lu sha ishigh ki TER heregh gbem, sha er Una tim m-umbur u ma i umbur ve sha won la kera.

¹⁶ Gadia a umbur mhôônom ma zungwen ga, kpa a tôv icanor man oribanave, a ican ityô, kua oryinanshima kpaa er una wua ve yô.

¹⁷ Een, ityuhwanev kpaa doo un, nahan mbi̱ gema mbi̱ hile sha a na; iveren doo un ga, nahan shi i̱ gba di ca a na je.

¹⁸ A̱ cir ityuhwanev iyol er ka ikondo na yô, mbi̱ nyôr un ken semayolough er mngerem nahan, man er mkurem nahan ken akuhe a na!

¹⁹ De, mbi̱ hingir un er ikondo i cirin iyol i a cirin la nahan, man er kwange u a zeren shin iwenge gbem yô.

²⁰ Ka injar i mbaahendanev av ma ve zough a mi hen TER je ne, mba ve kesem sha ifer kpaa yô.

²¹ Kpa We Aôndo, Tere, nenge sha kwagh wam sha ci u iti You, Yimam, er erdoo Wou la a doo yum yô.

²² Gadia m ngu icanor man oribanave, ishima vihim ken vanger tsung.

²³ M kar kera er mure u a gbe a ze ca yô; i mishim kera er ikomon nahan.

²⁴ Anu kpem cii sha ci u kwaghyan u hôron, iyol yam kande, ahôm kera nga ga;

²⁵ m gema m hingir kwagh u lahan hen ve; ka vea nenge a mo yô, ve gba jingir ityough.

²⁶ Wasem, TERE, Aôndo wam, yimam sha erdoo Wou;

²⁷ sha er vea fa er i lu uwegh Ough je, shi i lu We je, U er nahan ye, TERE.

²⁸ Ve yô, ve̱ gbaa tuhwan tsô, kpa We yô, naan iveren heregh. Ve̱ mough, ve̱ ya kunya, kpa wanakiriki Wou yô, a̱ ember.

²⁹ I̱ cir mbaahendanev av iheen iyol, kunya ve u̱ cir ve iyol er ka riga nahan.

³⁰ Me wuese TER kpishi sha zwa wam, me wuese Un ken atô u ikpelaior,

³¹ gadia til ken uwegh ku yanegh ku oribanave, sha u yiman un sha mba ve lu ôron un ijir i kuugh yô. Ka Pasalmi u Davidi