Upasalmi 108 - ICIGHAN BIBILO

¹ Ishima taver mo, Aôndo; me wa icam, een, me wa atsam a wuese, a uma wam cii.

² Nder, we adiguve u vesen man u kiriki kpaa! mo kpaa me nder sha use.

³ Me wuese We, TERE, ken atô u ior, me wa atsam a wuese We, ken akuraior.

⁴ Gadia erdoo Wou vese, kar Usha je, mimi Wou kpaa ar sha ikwavaôndo je.

⁵ Kende a iyol You sha je, kar Usha cii, Aôndo; iengem You kpaa i̱ kende i sha sha tar cii.

⁶ Sha er á yima mbadoon We ishima yô, yima sha uwegh Ough ku yanegh, ungwa imo yase.

⁷ Aôndo ôr kwagh ken icighanjiir Na: Mo Me ember yagh yagh, Me pav Shekem, man shi Me kar kwar sha pev u Sukoti.

⁸ Gileadi ka U Wam, Manase kpaa ka u Wam je; Eferaim ka kwagh u yisan ityough Yagh a mi je; Yuda ka tôgh Agh.

⁹ Moabi ka ikagh Yagh ki ôôn iyol a mi; sha Edom yô, Me kende ikôvough ki nguhar Yagh; Filitia yô, Me er ikenge Me ember un.

¹⁰ Ka an nana za a mo ken gar u taveraa? Ka an nana fatyô u zan a mo ken Edomo?

¹¹ Kera ka We, Aôndo, U te se kera gaa? U kera due a akumautya ase imôngo ga, Aôndo.

¹² Na se iwasen sha u nôngon a or u ahendanegh, gadia iwasen i or yô, ka gbilinkwagh tsô.

¹³ Ka ken Aôndo man sé eren akaa a ageegh ye; gadia ka Un Una ndyar mbaahendanev asev shin angahar ye. Ngun ka sha ci u orhemen u mbawanatsam. Ka Pasalmi u Davidi