Upasalmi 106 - ICIGHAN BIBILO

¹ Haleluya. Wuese nen TER, gadia A doo; gadia erdoo Na ka u tsôron gbem sha won.

² Ka an nana fatyô u ôron aeren a ageegh a TER, man nana pase iwuese Na cii?

³ Mba i saan ve iyol yô, ka mba ve we ajiraôron a mimi la iko, mba ve eren perapera gbem yô.

⁴ Umbur mo, TERE, sha mdoom Ou ma i doon We a ior Ou la; va sôrom a myom Wou,

⁵ sha er me nenge mkpeyol u uicuwan Ou, sha er me ember a nongo Wou ken msaanyol ve la, man me ta ihagh a dyako Wou imôngo yô.

⁶ Se er isholibo di er uter asev nahan, se er sha mi ga, se er aferakaa.

⁷ Zum u uter asev lu ken Igipiti la, ve wa akaa Ou a kpilighyol la iko ga, ve umbur erdoo Wou u ngeen yum la ga, kpa ve hendan hen zegemnger, ka Zegemnger u Nyian je la.

⁸ Nahan kpaa A yima ve sha ci u iti Na, sha u Una pase agee a Na a vesen yô;

⁹ A yange Zegemnger u Nyian, maa hingir tareghnyaagh; A per a ve shin iv er ka sha desereti nahan.

¹⁰ A yima ve sha ikev i or u kôron ve ihom, man A paa ve sha uwegh ku orihom kpaa.

¹¹ Mngerem uve mbaahendanev vev, mô ve shi ga.

¹² Tsô ve na mkaanem Nam jighjigh, ve wa icam i wuese Un.

¹³ Ica kpaa lu a gba ga, tsô ityom Na hungul ve, ve kera kegh awashima Na la ga;

¹⁴ ve lu tômon tsung tsung ken desereti, ve mee Aôndo ken toho;

¹⁵ A na ve kwagh u ve sen yô, kpa a tindi ve mkande ken ishima.

¹⁶ Shi ve er Mose iwuhe ken afo kpaa, kua Aron icighanor u TER.

¹⁷ Inya bugh, mena Datan, cir nongo u Abiram kpaa.

¹⁸ Usu yegh ken mkohol ve, nomborusu hia mbaaferev.

¹⁹ Ve er wanbua hen Horebi, ve gure ve civir eev mbu i ker a ker mbu yô,

²⁰ kape ve musan Iengem ve, ve ngohol eev mbu bua u yan toho sha ityough ki i la.

²¹ Aôndo Oryiman ve, hungul ve, u A er akaavesen ken Igipiti la,

²² ityom i cieryol ken tar u Ham, man akaacieryol hen Zegemnger u Nyian.

²³ Ka nahan man A kaa er, Una tim ve kera ye; ka Mose, icuwanor Na la, va tile Un sha ishi a zamber, sha u goom a iyugh Na kera, sha er A̱ de timin ve ga ye.

²⁴ Ve laha tar u dedoo la, ve na mkaanem Nam jighjigh ga;

²⁵ kpa ve er ivever ken utenti vev, ve ver ato sha imo i TER ga.

²⁶ Ka nahan man A kende uwegh Nagh sha A bum er Una wua ve ken desereti ye,

²⁷ shi Una sambe tsombor ve ken akuraior kpaa, Una tsenda ve sha ityar ityar.

²⁸ Shi ve zua a Baal-peor kangenaa, ve ya nagh ku i ne akaa a a lu uma ga la.

²⁹ Kape ve bam Un sha aeren a ve, man bouange kôr ve la.

³⁰ Tsô Pinehashi mough, tile, ôr ijir, bouange maa bee.

³¹ Tsô kwagh la maa hingir perapera na je, sha ikov ikov gbem sha won.

³² Ve bam Un kpaa hen mngerem ma Meriba, nahan kera kpe Mose iyol ga sha ci ve;

³³ gadia ve hendan a Jijingi Na, nahan a bugh zwa na, a ôr kwagh u kpeegh.

³⁴ Ve tim akuraior la er TER kaa ve nahan ga,

³⁵ kpa ve nungwa a atôatyev la, ve hen aeren a ve;

³⁶ ve civir ieev vev, kwagh la gema hingir ihônon hen a ve.

³⁷ Ve gema ônov vev mba nomso man mba kasev ve na ujijingi mba bov nagh a mi;

³⁸ ve haa awambe a mbaishôôv inya, ka awambe a ônov vev mba nomso man mba kasev, mba ve ne ieev mbi Kanaan nagh a mi je la; nahan tar cii hôngor sha awambe.

³⁹ Kape ve hôngor sha aeren a ve la, ve gba eren idya sha aeren a ve la;

⁴⁰ ka nahan man iyugh i TER mough sha ior Nav, dyako Na kpaa ndôhôr Un ishima ye.

⁴¹ Nahan A gema ve A na ve sha ikev i akuraior, mba ve ker ve ihom la gema tema tor sha a ve.

⁴² Mbaihomov vev kpaa kighir ve a ican, ve var inya sha ikev ve.

⁴³ A yima ve acin imôngo, kpa ve lu hendan a Na sha mbamhen vev mbala; ka nahan man ve saa ken iferkwagh ve ye.

⁴⁴ Nahan kpaa A wa iko a ican ve, zum u A ungwa mliam vem la;

⁴⁵ a umbur ikuryan Na sha ci ve kpaa, mhôônom kôr Un, sha ci u A ngee a erdoo yô.

⁴⁶ Shi A er mhôônom kôr mba ve yem a ve uikangen la a ve.

⁴⁷ Yima se, TERE, Aôndo wase, due a vese ken akuraior kera, sha er se̱ sugh icighanti Wou man se̱ ta ihagh sha iwuese You yô.

⁴⁸ I̱ wuese TER, Aôndo u Iserael, hii sha uicôronmbaashighev zan zan gbem sha won; ior ci ca ve̱ kaa er: Amen. Haleluya.