Upasalmi 101 - ICIGHAN BIBILO

¹ Me wa icam me ter erdoo kua ijirôron i mimi kpaa; me wa atsam a wuese We, TERE.

² Me ver ishima sha gbenda u u lu a acôghol a wan iyol ga yô. Ka hanma shighe je man Ú shi va hen a moo? Me zenden a ishima i lun a acôghol a wan iyol ga ken iyou yam.

³ Me kera ver kwagh u dang sha ashe am mayange ga; m kôr aeren a mba ve kaha ve undu gbenda la ihom, aa var a mo ga.

⁴ Boshima a̱ lu ca a mo; me fa iferkwagh ga.

⁵ Or u nan eren anger ken myer sha orwanndor a nan yô, me tim nan kera; man or u nan manger man nan kehen ityough yô, me wa ishima a nan ga.

⁶ Ashe am aa lu sha mbamimi mba shin tar, sha u vea lu a mo imôngo yô; or u nan zenden sha gbenda u lun a acôghol a wan iyol ga yô, ka nan je nana erem tom ye.

⁷ Or u nan eren kwagh sha icugh yô, nana lu ken ya wam ga; man or u nan eren aie kpaa, nana kera tema sha ishigh yagh ga.

⁸ Hanma sev me timin mbaaferev mba shin tar cii kera; ken gar u TER kpaa me gber mbaereniferkwagh la cii kera. Ka msen u or u ican i tser nan, zum u tar u hembe nan nan pase ican i nan cii sha ishigh ki TER yô