Ukwelegh 5 - ICIGHAN BIBILO

¹ TERE, umbur kwagh u a tser se ne; gema ashe, nenge iheen yase.

² I gema dyako wase i na mbavannya, ayou a ase kpaa, i na ior mba ken ityar igen.

³ Se hingir ancôgholov, se mba a ter ga, ungô asev hingir er kasev mba côgholov nahan.

⁴ Se mba me mngerem asem sha inyar; ikon yase kpaa, se mba zuan a mi sha inyar.

⁵ Mbatorough a vese, mba se sha imon; se vôr, mba rumun er se̱ mem ga.

⁶ Ka hen Mbaigipiti, se dugh ave, kua hen Mbaashiria sha u ma se zough a kwaghyan u una kuma se yô.

⁷ Uter asev er isholibo, kera mba ga; se yô, se tôô mtsaha u aferakaa a ve.

⁸ Ikpan ngi yan tor, sha a vese; ma or u yiman se sha ikev ve nan ngu ga.

⁹ Ka sha u wan uuma asev iko ga, se zough a kwaghyan wase ye; sha ci u sanker u ken taaikôngo la.

¹⁰ Kwavyolough wase tsee er sweliwa nahan, sha ci u mtsee u tsung u ijen.

¹¹ Ve nzughul a kasev ken Shion, ônkasev mba ken agar a Yuda la.

¹² Ve sende atiator sha ave ve; i civir ishiv mbi mbatamen kpaa ga.

¹³ Ikaior tôô nase man mbayev nôngo gbev a ikaghikon.

¹⁴ Mbatamen mba hen hundagar ga; ikaior kpaa kera mba kuhwan ityogholov ga.

¹⁵ Iember i ken ishima yase bee; amar a ase kpaa hingir ijungwen.

¹⁶ Idyer i tor bugh se sha ityou, gba inya; kwagh tser se ve, gadia se er isholibo.

¹⁷ Sha ci u nahan yô, ishima yase ure, sha ci u akaa angan yô, ashe ase hingir dimii,

¹⁸ sha ci u uwo u Shion, u u hingir ice yô, ugbaseela mba zenden sha mi.

¹⁹ Kpa We TERE, U ngu her gbem sha won, U tema tor sha ikov ikov.

²⁰ Ka nyi man se hungul We gbeme, man U gbihi se kera ayange a ngee nahana?

²¹ Hide a vese hen a We, TERE, tsô se hide hen a We; er sha ayange a tsuaa la nahan.

²² Shin U ta a ta se kera je ase? Shin ishima i vihi U a vese i ganda?