Ukwelegh 2 - ICIGHAN BIBILO

¹ Kpei! Nenge er TER A cir wankwase u Shion abeen iyol sha iyugh Na! A kende iengem i Iserael i gba shin inya, A umbur kwagh Na u tan angahar sha mi sha iyange i iyugh Na la ga.

² TER vihi ajiir a teman a Yakob la cii, A zungwe mhôônom ga; sha iyugh Na la, A yôhôl ayouautya a taver a wankwase u Yuda la kera, A haa a inya; A vihi tartor man mbatarev mba u kpaa.

³ Sha iyugh Na i tsung, A gber hanma korough ku Iserael; A hide a uwegh Nagh ku yanegh ijime sha ishigh ki orihom; A yegh ken Yakob er nomborusu u hian akaa a a kase u cii yô;

⁴ A henda ada Na er ka orihom nahan, A tile A kende uwegh Nagh ku yanegh sha er ka orahendanegh nahan; man A wua mba ve doo u kenger sha ashe cii; ken tenti u wankwase u Shion la, A haa iyugh Na er usu nahan.

⁵ TER hingir er orihom nahan, A vihi Iserael kera; A vihi ayou a na a tor cii kera; A yôhôl ayouautya na a taver; man A seer wankwase u Yuda mzungu man ijungwen.

⁶ A vihi tenti Na kera, er ka igyar i sule nahan; A hembe ijiir i mkohol Na la; TER na, i hungul mkohol u iniongo man iyange i memen ken Shion kera. Sha mvihi u iyugh Na la A laha tor kua pristi.

⁷ TER ta atse a Na a nan nagh sha mi la kera, A venda icighanjiir Na, A na ukpekpe mba ayou a Na a taven sha la, sha ikev i orihom; ve ger ayôôso ken iyou i TER, er ka sha iyange i iniongo nahan.

⁸ TER wa ishima u hemben kpekpe u wankwase u Shion; A samber kor u karen kwagh, A hide a uwegh Nagh ijime sha u timin ga; A er akpagar man kpekpe ve zungwe; ve yôhôl imôngo.

⁹ Ihinda na sen mire shin inya; A vihi uishindan nav, A kever ve kera. Tor na man atiator a na mba ken akuraior ape i tesen atindi ga la; uprofeti nav kpaa zua a mpase u sha mnenge hen TER ga.

¹⁰ Mbatamen mba wankwase u Shion shar inya, mba ving, ve haa inya sha ityouv vev, ve ta akondo uya. Anuunaukase a Yerusalem wa ityouv inya.

¹¹ Ashe am hungwa ikôr sha ci u mlia, myam am zômon, mtemam am sough haa inya cii, sha ci u mtim u wankwase u ior av; sha ci u mbayev mba kiriki man mbamanatumba hume sha ityembe i ken gar.

¹² Mba pinen ungô vev er: Uwua man zar u wain mba hana? Zum u ve hume er ka mba i gber ve avav nahan sha ityembe i ken gar, zum u ve kpe ungô vev sha ikum la.

¹³ Ka nyi kwagh me pase u, man ka nyi kwagh me kar u sha mi, we wankwase u Yerusalem? Ka nyi kwagh me zua u sha mi, sha u me sur u ishima, we iniunkwase u Shiono? Gadia mvihi wou gbangese er zegemnger nahan; ka anti nana fatyô u sôron mvihi wou laa?

¹⁴ Uprofeti ou nenge a mbampase mba sha mnenge sha ci wou mba aiev man mba gbilinigh; ve pase u ifer you sha u hiden a we ken uikangen kera ga; kpa ve nenge a akaaôron a aiegh sha ci wou man a zan a we ken mtsum.

¹⁵ Mbakarengbenda cii mba kuren we ave; mba gbiren awer jingir ityough sha wankwase u Yerusalem, kaan er: Ka gar u lu i yilan er, dooashe u hemban, iember i tar cii je nee?

¹⁶ Mbaihomov ou cii aver zwa gbanger sha a we; ve gbire awer, ve nyuma tsombo, mba kaan er: Se mena un ve; mimi je ka iyange i se lu veren ishima sha mi je ne; se ar sha i, se nenge a i ve.

¹⁷ TER er kwagh u lu wa ishima la; A kure kwaghôron Na u A kaa ayange a tsuaa la yô, A yôhôl, A zungwe mhôônom ga; A na orihom a ember sha a we, A kende korough ku mbaahendanev ou sha.

¹⁸ Ishima ve ngi vaan yilan TER; we, kpekpe u wankwase u Shion, ndôôr mliam er kungômnger nahan tugh man atetan; de ne iyol you mmem ga; hongorshe wou kpaa a̱ de memen ga.

¹⁹ Mough, vaa mliam tugh, sha mhii u mbamkor mba utugh, ur ishima you inya er mngerem nahan sha ishigh ki TER; kende ave a ou sha her a Na sha ci u uma u mbayev ou mba ve hum sha ijen sha ityough ki hanma gbenda yô.

²⁰ Nenge, TERE, nenge, un u U er kwagh a na nahan ne! Kasev ve̱ ya ônov vev, mba ve tee ve sha ave laa? I̱ wua pristi man profeti ken icighanjiir u TERE?

²¹ Kwaor man ortamen mba yaven hen inya sha igbenda; anuunaukase am man mbayevikaior av kpe ku sha sanker; U wua ve sha iyange i iyugh You; U sôngo ve, U zungwe mhôônom ga.

²² U lôhô mcieryol va kasem avegher cii tser, er ka sha iyange i iniongo nahan; ma or u yevese shin u waren kera lu sha iyange i iyugh i TER la ga; mba m tee ve sha ave man mba m yese ve la, orihom wam va tim ve kera.