Titu 3 - ICIGHAN BIBILO

¹ Umbur ve ve̱ ungwan imo i mbatarev man mbautahav man mba ve nengen sha akaa, ve̱ de karen imo ve ga, ve̱ wa iyol ve kegh a kegh sha u eren hanma tom u dedoo,

² ve̱ de er kwagh u dang sha ma or ga, ve̱ de lu mbanôngonnum ga, ve̱ lu a ishima i legh legh ve̱ hide a ayol a ve ijime hen ior cii.

³ Gadia se kpaa, ngise se lu mbalanenkwagh se hemban ato, se tsumen, se lu ikpan i asaren man ugurgurmbaakaav atô kposo kposo, se lu zenden sha aferakaa man iwuhe i eren, mbagenev kôr se ihom shi se lu ihom ayol a ase kpaa.

⁴ Kpa zum u mhôônom ma kôron man dooshima u Aôndo Oryiman wase va ande yô,

⁵ A yima se, lu sha aeren a ase a perapera ga, kpa lu sha mhôônom ma zungwen Nam iyol Na lu sha m-ee u i ôô se sha mmar u he, man sha mgem u he u sha Icighan Jijingi

⁶ u A haa sha a vese wuee ken Yesu Kristu Oryiman wase la,

⁷ sha u i̱ na se ishô sha mrumun u sha mhôôn Na, se̱ hingir mbayandyako sha ishimaveren keghen uma u tsôron la.

⁸ Kwaghôron ne ka u jighjigh, sarem pe we ôron akaa ne sha gbashima sha u mba ve suur sha Aôndo yô, ve̱ ver ishima ve̱ tile sha aeren a dedoo her. Ka a je a doo ior shi a lu ve a inja kpaa ye.

⁹ Kpa kem iyol sha anyimanaikaa a ibume man icombor i ôron man u nyiman akaa sha kwagh u atindi. Akaa angan nga a inja ga, ka gbilin tsô.

¹⁰ Or u van a mpav ken nongo u Kristu yô, wa nan kwagh kwa môm shin kwa har nahan, tsô ú de kwagh u nan,

¹¹ gadia u fa imbaor la tsume, nan er isholibo nan na iyol i nan ibo kera kpaa.

¹² Zum u Aretema shin Tikiku una va hen we yô, nôngo va kohol mo ken Nikopoli gadia m ver ishima mer ka her me lu sha shighe u fam ye.

¹³ Nôngo wa Zena oratindigh la ikav man shi Apolo kpaa sha mmough ve, kwagh a̱ de banen ve ga.

¹⁴ Ior mba ken vese ve̱ hen er vea er ityom i injaa sha u wasen sha ugbayol yô, atam a̱ de banen hen a ve ga.

¹⁵ Mba ve lu a mo cii mba sughun we. Sugh mba se doo ve ishima ken jighjigh u nan la, na se. Mrumun u sha mhôôn a̱ lu sha a ven cii.